ദില്ലി: ജി 20 ഉച്ചകോടിയോടനുബന്ധിച്ച് രാജ്യ തലസ്ഥാനത്ത് വിപുലമായ സുരക്ഷാ ക്രമീകരണങ്ങളും ഗതാഗത നിയന്ത്രണങ്ങളുമാണ് ഏര്പ്പെടുത്തിയിരിക്കുന്നത്. ഇതിന്റെ ഭാഗമായി ഈ ദിവസങ്ങളില് ഡല്ഹിയില് ഓണ്ലൈന് ഭക്ഷണ വിതരണത്തിന് വിലക്ക് ഏര്പ്പെടുത്തി. എന്ഡിഎംസി മേഖലയിലെ വാണിജ്യ സേവനങ്ങള് നിര്ത്തിയതിനാല്, ക്ലൗഡ് കിച്ചണുകളും ഫുഡ് ഡെലിവറികളും ആമസോണ് ഡെലിവറികള് പോലെയുള്ളവയും അനുവദിക്കില്ലെന്ന് സ്പെഷ്യല് പോലീസ് കമ്മീഷണര് എസ് എസ് യാദവ് പറഞ്ഞു. ജി 20 ഉച്ചകോടിയിയുടെ ഭാഗമായി നഗരത്തില് ലോക്ക്ഡൗണ് ഉണ്ടാകില്ലെന്നും ഡല്ഹി പോലീസ് അറിയിച്ചു.
നഗരത്തില് വിപുലമായ ഗതാഗത ക്രമീകരണങ്ങളും പ്രഖ്യാപിച്ചിട്ടുണ്ട്. ഗുരുഗ്രാം ട്രാഫിക് പോലീസിന്റെ അറിയിപ്പ് അനുസരിച്ച്, സെപ്തംബര് 7 അര്ദ്ധരാത്രി മുതല് സെപ്റ്റംബര് 10 അര്ദ്ധരാത്രി വരെ ഡല്ഹിയിലേക്കുള്ള വാഹനങ്ങളടെ പ്രവേശനം നിയന്ത്രിക്കും. ഗതാഗത നിയന്ത്രണങ്ങള് ധൗല കുവാന് റൂട്ടിനെ ബാധിക്കാം. സെപ്തംബര് എട്ടിന് ജീവനക്കാര്ക്ക് ഫ്രം ഹോം നല്കാനും പോലീസ് ഗുരുഗ്രാമിലെ കമ്പനികളോട് നിര്ദ്ദേശിച്ചു. ഡല്ഹി സര്ക്കാര് സെപ്റ്റംബര് 8 മുതല് 10 വരെ രാജ്യതലസ്ഥാനത്ത് പൊതു അവധി പ്രഖ്യാപിച്ചു. ഉച്ചകോടിയുടെ പശ്ചാത്തലത്തില്, നഗരത്തിലെ കടകള്, വ്യാപാര – വാണിജ്യ സ്ഥാപനങ്ങള് എന്നിവയുടെ ഉടമകളോട്, ജീവനക്കാര്ക്ക് സെപ്റ്റംബര് 8, 9, 10 തീയതികളില് ശമ്പളത്തോടുകൂടിയ അവധി നല്കാനും സര്ക്കാര് നിര്ദ്ദേശിച്ചു.
