ന്യൂഡല്ഹി : സോണിയ ഗാന്ധിയും പ്രിയങ്ക ഗാന്ധിയും കോണ്ഗ്രസ് പാര്ട്ടിയിലെ സ്ഥാനങ്ങള് ഒഴിഞ്ഞേക്കുമെന്ന് സൂചനകള്. അഞ്ച് സംസ്ഥാനങ്ങളിലെ ദയനീയ പ്രകടനത്തിന്റെ പശ്ചാത്തലത്തില് നാളെ ചേരുന്ന പ്രവര്ത്തക സമിതി യോഗത്തില് വച്ച് ഇരുവരും രാജി സന്നദ്ധത അറിയിക്കുമെന്നാണ് റിപ്പോര്ട്ടുകള്. രാഹുല് ഗാന്ധിയും എഐസിസി കമ്മിറ്റിയില് നിന്ന് മാറി നില്ക്കാന് സന്നദ്ധത അറിയിച്ചതായും റിപ്പോര്ട്ടുകളുണ്ട്.
സോണിയ അധ്യക്ഷ സ്ഥാനം ഒഴിഞ്ഞേക്കുമെന്നാണ് സൂചനകള്. പ്രിയങ്ക ഗാന്ധി എഐസിസി ജനറല് സെക്രട്ടറി സ്ഥാനവും രാജിവച്ചേക്കും. സോണിയ സ്ഥാനം രാജി വച്ചാല് 25 വര്ഷങ്ങള്ക്ക് ശേഷം കോണ്ഗ്രസിന് ഗാന്ധി കുടുംബത്തില് നിന്ന് അല്ലാത്ത ഒരാള് സംഘടനാ തലപ്പത്തേയ്ക്ക് എത്തും. അഞ്ച് സംസ്ഥാനങ്ങളില് ഏറ്റ കനത്ത തോല്വിക്ക് പിന്നാലെയാണ് നാളെ പ്രവര്ത്തക സമിതി യോഗം വിളിച്ചത്.
എഐസിസി ആസ്ഥാനത്ത് നടക്കുന്ന വര്ക്കിങ് കമ്മിറ്റി യോഗത്തില് തോല്വിയെക്കുറിച്ച് വിശദമായി ചര്ച്ച ചെയ്യും. നേതൃത്വത്തിന് എതിരെ മുതിര്ന്ന നേതാക്കള് ഉള്പ്പെടെ നടത്തിയ വിമര്ശനങ്ങളും ചര്ച്ചയായേക്കും എന്നാണ് സൂചന. നിയമസഭ തെരഞ്ഞെടുപ്പ് നടന്ന സംസ്ഥാനങ്ങളിലെ ജനറല് സെക്രട്ടറിമാര് തോല്വി സംബന്ധിച്ച റിപ്പോര്ട്ട് യോഗത്തില് അവതരിപ്പിക്കും.
തോല്വിക്ക് പിന്നാലെ പാര്ട്ടിയില് നേതൃമാറ്റം വേണമെന്നും പ്രവര്ത്തന ശൈലി മാറണമെന്നും ആവശ്യമുയര്ന്നിട്ടുണ്ട്. നേതൃത്വുമായി ഇടഞ്ഞുനില്ക്കുന്ന ജി 23 നേതാക്കള്, പ്രവര്ത്തക സമിതി അടിയന്തരമായി വിളിച്ചു ചേര്ക്കണമെന്ന് ആവശ്യപ്പെട്ടിരുന്നു. പഞ്ചാബില് ഭരണം നഷ്ടമായതും പ്രിയങ്ക ഗാന്ധി തന്നെ കളത്തിലിറങ്ങിയിട്ടും യുപിയില് ദയനീയ പരാജയത്തിലേക്ക് പോയതും വലിയ വിമര്ശനം ഉയര്ന്നിട്ടുണ്ട്.
