ദില്ലി: ഗാന്ധി സമാധാന പുരസ്കാരം ഗോരഖ്പൂരിലെ ഗീത പ്രസിന് നല്കാനുളള തീരുമാനത്തെ വിമര്ശിച്ച് കോണ്ഗ്രസ് നേതാവ് ജയ്റാം രമേശ്. അവാര്ഡിനായി ഗീത പ്രസ് തിരഞ്ഞെടുത്തത് പരിഹാസ്യമാണെന്നും അദ്ദേഹം പറഞ്ഞു. ഞായറാഴ്ച്ചയാണ് ഗോരഖ്പൂരിലെ ഗീത പ്രസിന് 2021 ലെ ഗാന്ധി സമാധാന പുരസ്കാരം നല്കുമെന്ന ഔദ്യോഗിക അറിയിപ്പ് വന്നത്. പ്രധാനമന്ത്രി മോദി അധ്യക്ഷനായ ജൂറി ഏകകണ്ഠമായാണ് ഗീതാ പ്രസിനെ പുരസ്കാരത്തിന് അര്ഹമായി തിരഞ്ഞെടുത്തത്.
2021 ലെ ഗാന്ധി സമാധാന പുരസ്കാരം ഗീതാ പ്രസിന് നല്കുന്നത് സവര്ക്കറിനും ഗോഡ്സെയ്ക്കും നല്കുന്നതുപോലെയായിരിക്കും എന്നാണ് ജയ്റാം രമേശ് ട്വിറ്ററില് വിമര്ശിച്ചത്. 16.21 കോടി ശ്രീമദ് ഭഗവദ്ഗീത ഉള്പ്പെടെ 14 ഭാഷകളിലായി 41.7 കോടി പുസ്തകങ്ങള് പ്രസിദ്ധീകരിച്ച ഗീത പ്രസ് ലോകത്തിലെ ഏറ്റവും വലിയ പ്രസാധകരില് ഒന്നാണെന്നാണ് ഔദ്യോഗിക പ്രസ്താവനയില് പറയുന്നത്. പുരസ്കാരം നേടിയ ഗീത പ്രസിനെ പ്രധാനമന്ത്രി മോദി അഭിനന്ദിക്കുകയും അവര് ഈ രംഗത്ത് നല്കിയ സംഭാവനകളെ അഭിനന്ദിക്കുകയും ചെയ്തു.
