മല്ലപ്പള്ളി : അടഞ്ഞുകിടക്കുന്ന മിനി മെറ്റീരിയൽ കളക്ഷൻ സെന്ററിന് പുറത്ത് മാലിന്യം തളളുന്നത് പതിവാകുന്നു. കോട്ടാങ്ങൽ പഞ്ചായത്തിലെ എട്ടാം വാർഡിൽ പെട്ട ചുങ്കപ്പാറ – ആല പ്രക്കാട് റോഡിലാണ് കളക്ഷൻ സെന്ററിന് പുറത്ത് മാലിന്യം തള്ളുന്നത്. ചാക്കിലും പ്ലാസ്റ്റിക് കവറുകളിലും മറ്റുമാണ് സെന്ററിനു സമീപം മാലിന്യം കൊണ്ട് വന്നിടുന്നത്. തെരുവ് നായ്ക്കളും പക്ഷികളും മറ്റും മാലിന്യങ്ങൾ കൊത്തിവലിച്ച് റോഡിലേക്കും പരക്കുകയാണ്.
അജൈവ മാലിന്യം സംഭരിക്കുന്നതിനു വേണ്ടിയാണ് കളക്ഷൻ സെന്റർ സ്ഥാപിച്ചതെങ്കിലും വീടുകളിൽ നിന്നുള്ള ഭക്ഷ്യാവശിഷ്ടങ്ങളും മറ്റും തള്ളു ന്നതുകാരണം ദുർഗന്ധം വമിക്കുന്നതിനാൽ ഇതു വഴിയുള്ള വാഹന യാത്ര പോലും ദുസഹമായിരിക്കുകയാണ്. സമീപത്ത് ഇഴജന്തുകളുടെയും ശല്യം വർധിച്ചത് കൊണ്ട് ഇതുവഴിയുള്ള കാൽ നടയാത്രപോലും ദുരിതമായിരിക്കുകയാണ്. കളക്ഷൻ സെന്ററിലും പുറത്തും കൂടികിടക്കുന്ന മാലിന്യം നീക്കം ചെയ്യാൻ നടപടി ഉണ്ടാകണമെന്ന ആവശ്യം ശക്തമായിരിക്കുകയാണ്.
