ന്യൂഡൽഹി : മുനിസിപ്പൽ കോർപറേഷൻ തിരഞ്ഞെടുപ്പിൽ മാലിന്യസംസ്കരണം മുഖ്യ വിഷയമാക്കാനൊരുങ്ങുകയാണ് എഎപി. ഡൽഹിയിലേത് ബിജെപി നിർമിത മാലിന്യ മലയാണെന്നും ഡൽഹി മുനിസിപ്പൽ കോർപ്പറേഷൻ (എംസിഡി) ഭരണം നൽകിയാൽ അഞ്ചുവർഷം കൊണ്ട് ഡൽഹിയെ ക്ലീൻ സിറ്റിയാക്കുമെന്നും എഎപി എംഎൽഎ സോംനാഥ് ഭാരതി പറഞ്ഞു.
ഡൽഹി – യുപി അതിർത്തിയിലെ ഗാസിപുർ മാലിന്യ സംഭരണ കേന്ദ്രം ഏഷ്യയിലെ തന്നെ ഏറ്റവും വലിയ മാലിന്യ കേന്ദ്രമായി മാറിക്കഴിഞ്ഞിരിക്കുകയാണ്. ബൽസ്വ, ഓഖ്ല എന്നിവിടങ്ങളിലും ഗാസിപുരിന് സമാനമായ മാലിന്യ കേന്ദ്രങ്ങളുണ്ട്. ഇതിന്റെ പരിസരത്തു താമസിക്കുന്നവർ ശ്വാസകോശ – ത്വക്ക് രോഗങ്ങളുടെ ഭീഷണിയിലാണ്.
കഴിഞ്ഞ 15 വർഷം നഗരത്തിലെ കോർപറേഷനുകളിൽ ഭരണം നടത്തിയ ബിജെപി മാലിന്യവിഷയത്തിൽ ഒന്നും ചെയ്തില്ലെന്നും മാലിന്യമലകളുടെ വലുപ്പം കൂട്ടുക മാത്രമാണു ചെയ്തതെന്നും അരവിന്ദ് കേജ്രിവാൾ പറഞ്ഞു. ‘കോർപറേഷൻ ഭരണത്തിൽ ബിജെപി കാട്ടിയ അഴിമതിയുടെ ബാക്കിപത്രമാണു ഈ മാലിന്യമലകൾ. തിരഞ്ഞെടുപ്പിൽ ഇതിനു കൃത്യമായ മറുപടി നൽകണമെന്നും അദ്ദേഹം പ്രതികരിച്ചു.
