സീതത്തോട് : സീതത്തോട് ചന്തയില് കുന്നുകൂടുന്ന മാലിന്യങ്ങള് സംസ്കരിക്കാന് നടപടിയില്ല. ചന്തക്കുള്ളില് സ്വാശ്രയ കര്ഷക വിപണിയും മീന് ചന്തയും പ്രവര്ത്തിക്കുന്ന പഴയ കെട്ടിടത്തിനുള്ളിലാണ് പഞ്ചായത്ത് ശേഖരിക്കുന്ന മാലിന്യങ്ങള് കുന്നുകൂട്ടിയിട്ടിരിക്കുന്നത്. ഇതിന് സമീപമാണ് ആളുകള് മീനും ഇറച്ചിയും വാങ്ങാന് എത്തുന്നതും. മഴക്കാലമാരംഭിച്ചതോടെ മാലിന്യത്തില് നിന്നും ഒഴുകി ഇറങ്ങുന്ന ദുര്ഗന്ധമുള്ള വെള്ളം പ്രദേശമാകെ വ്യാപിച്ചിട്ടുണ്ട്. ചന്തയില് സാധനങ്ങള് വാങ്ങാന് എത്തുന്നയാളുകള് ഈ മലിനജലത്തില് ചവിട്ടിവേണം നടക്കുവാന്. പഞ്ചായത്തിന് മാലിന്യ സംസ്കരണ സംവിധാനങ്ങളും നിലവിലില്ല. വിവിധ വാര്ഡുകളില് നിന്നായി ഹരിത കര്മ്മ സേന ശേഖരിക്കുന്ന മാലിന്യങ്ങളാണ് ചാക്കില് കെട്ടി കര്ഷക വിപണിയുടെ കെട്ടിടത്തില് തള്ളിയിരിക്കുന്നത്.
കാലപ്പഴക്കം മൂലം നാശാവസ്ഥയിലായ കെട്ടിടത്തിനുള്ളിലാണ് ഇത്തരത്തില് മാലിന്യങ്ങള് തള്ളിയിരിക്കുന്നത് എന്നതാണ് പ്രധാന കാര്യം. ഇതിനോട് ചേര്ന്നാണ് മീനും ഇറച്ചിയും വില്ക്കുന്ന സ്റ്റാളുകള് പ്രവര്ത്തിക്കുന്നത്. ഇവിടെ സാധനം വാങ്ങാന് എത്തുന്നവര് ഈ മലിനജലത്തില് ചവിട്ടിനിന്നാണ് സാധനങ്ങള് വാങ്ങി പോകുന്നത്. രാവിലെ മുതല് വൈകുന്നേരം വരെ ദുര്ഗന്ധം സഹിച്ച് ഇവിടെ ജോലി ചെയ്യുന്ന കച്ചവടക്കാരുടെ അവസ്ഥയും ദയനീയമാണ്. കാലങ്ങളായി കൂട്ടിയിട്ടിരിക്കുന്ന മാലിന്യങ്ങള് നീക്കം ചെയ്യുവാന് സീതത്തോട് പഞ്ചായത്ത് അധികാരികള് യാതൊരു നടപടിയും സ്വീകരിക്കുന്നില്ല. നാടെങ്ങും മഴക്കാല പൂര്വ്വ ശുചീകരണ പ്രവര്ത്തികള് തകൃതിയായി നടക്കുമ്പോഴാണ് സീതത്തോട് പഞ്ചായത്ത് അധികൃതരുടെ ഭാഗത്ത് നിന്നുമുള്ള ഈ കടുത്ത അനാസ്ഥ.
