ചെങ്ങന്നൂർ: ലോക വനിതാ ദിനത്തോടനുബന്ധിച്ച് അഖിലേന്ത്യാ മഹിളാ സാംസ്കാരിക സംഘടനയുടെ നേതൃത്വത്തിൽ ചെങ്ങന്നൂർ വൈഎംസിഎയിൽ കെ – റെയിൽ സിൽവർ ലൈൻ വിരുദ്ധ പ്രക്ഷോഭരംഗത്തെ വനിതാ പോരാളികളുടെ സംഗമം സംഘടിപ്പിച്ചു. മഹിളാ സാംസ്കാരിക സംഘടന സംസ്ഥാന പ്രസിഡന്റ് എസ്.സൗഭാഗ്യകുമാരി അദ്ധ്യക്ഷത വഹിച്ച സംഗമം സമര സമിതി സംസ്ഥാന കമ്മിറ്റി അംഗം ഷൈല കെ ജോൺ ഉദ്ഘാടനം ചെയ്തു. സമര സമിതി സംസ്ഥാന ജനറൽ കൺവീനർ എസ്.രാജീവൻ മുഖ്യപ്രഭാഷണം നടത്തി.
സമിതി സംസ്ഥാന കമ്മിറ്റി അംഗം മിനി കെ ഫിലിപ്പ്, മഹിളാ സാംസ്കാരിക സംഘടന സംസ്ഥാന സെക്രട്ടറി കെ.എം ബീവി, സമര സമിതി സംസ്ഥാന കൺവീനർ ശരണ്യ രാജ്, ജയിലിൽ അടയ്ക്കപ്പെട്ട സിന്ധു ജേയിംസിന്റെ മാതാവ് ശാന്ത എന്നിവർ പ്രസംഗിച്ചു. സമര പോരാളികളായ ജയമണി (തിരുവനന്തപുരം), മഞ്ജുഷ (പടനിലം), നിഷ സുരേഷ് (കൊഴുവല്ലൂർ), ഗീതാകുമാരി (പള്ളിക്കൽ), തുടങ്ങിയവർ സമരാനുഭവം പങ്കുവെച്ചു. മഹിളാ സാംസ്കാരിക സംഘടന സംസ്ഥാന കമ്മിറ്റി അംഗങ്ങളായ കെ.ജെ ഷീല, എസ്.രാധമണി എന്നിവരും പ്രസംഗിച്ചു.
