ന്യൂഡൽഹി: ചെറിയ ഇടവേളയ്ക്ക് ശേഷം വീണ്ടും ഏഷ്യയിലെ ഏറ്റവും സമ്പന്നനായ വ്യക്തിയായി ഗൗതം അദാനി മുന്നിലെത്തി. റിലയൻസ് ഇൻഡസ്ട്രീസ് ചെയർമാൻ മുകേഷ് അംബാനിയെയും സോഫ്റ്റ്ബാങ്ക് സിഇഒ മസായോഷി സോണിനെയും മറികടന്നാണ് അദാനി ഒന്നാം സ്ഥാനം തിരിച്ചുപിടിച്ചത്. ഓഹരി വിപണിയിലെ ശക്തമായ മുന്നേറ്റമാണ് അദാനിയുടെ ആസ്തിവിലയിൽ വലിയ വർധനവിന് കാരണമായത്. നിലവിലെ കണക്കുകൾ പ്രകാരം അദാനിയുടെ മൊത്തം ആസ്തി 89.2 ബില്യൺ ഡോളറായാണ് ഉയർന്നിരിക്കുന്നത്. അതേസമയം മുകേഷ് അംബാനിയുടെ ആസ്തി 88 ബില്യൺ ഡോളറും മസായോഷി സോണിന്റെ ആസ്തി 87 ബില്യൺ ഡോളറുമാണ്. അദാനി ഗ്രൂപ്പിന്റെ പ്രധാന കമ്പനികളായ അദാനി ഗ്രീൻ എനർജി, അദാനി എനർജി എന്നിവയുടെ ഓഹരികളിൽ ഉണ്ടായ ശക്തമായ ഉയർച്ചയാണ് ഈ നേട്ടത്തിന് പിന്നിലെ പ്രധാന കാരണം. അദാനി ഗ്രീൻ എനർജി ഓഹരികൾ ഏകദേശം 7 ശതമാനം വർധന രേഖപ്പെടുത്തിയപ്പോൾ അദാനി എനർജി ഓഹരികൾ 4 ശതമാനം ഉയർന്നു. കൂടാതെ അദാനി എന്റർപ്രൈസസ്, അദാനി പോർട്സ് ആൻഡ് സ്പെഷ്യൽ ഇക്കണോമിക് സോൺ തുടങ്ങിയ കമ്പനികളുടെ ഓഹരികളും നേട്ടം രേഖപ്പെടുത്തി.
കഴിഞ്ഞ മാസം അദാനി ഗ്രൂപ്പിനെതിരായ യുഎസ് നീതിന്യായ വകുപ്പിന്റെ തട്ടിപ്പ് കേസ് പിൻവലിച്ചതും നിക്ഷേപകരുടെ വിശ്വാസം വർധിപ്പിക്കാൻ കാരണമായതായി വിപണി നിരീക്ഷകർ വിലയിരുത്തുന്നു. സോളാർ എനർജി കരാറുകളുമായി ബന്ധപ്പെട്ട ആരോപണങ്ങളായിരുന്നു കേസ്. ഇതിന് പിന്നാലെ അദാനി ഗ്രൂപ്പിന്റെ ആസ്തിയിൽ ഏകദേശം 10 ബില്യൺ ഡോളറിന്റെ വർധനവാണ് രേഖപ്പെടുത്തിയത്. മുൻപ് ഹിൻഡൻബർഗ് റിസർച്ച് പുറത്തുവിട്ട റിപ്പോർട്ടിനെ തുടർന്ന് അദാനി ഗ്രൂപ്പിന്റെ ഓഹരികൾ വലിയ ഇടിവ് നേരിട്ടിരുന്നുവെങ്കിലും നിലവിലെ വിപണി മുന്നേറ്റം ഗ്രൂപ്പിന് ശക്തമായ തിരിച്ചുവരവിന് വഴിയൊരുക്കിയിരിക്കുകയാണ്.
