മുംബൈ; ആള്‍ദൈവത്തിന്റെ പ്രഭാഷണത്തിനിടെ മോഷണം. മീരാ റോഡിലെ സലാസര്‍ സെന്‍ട്രല്‍ പാര്‍ക്ക് ഗ്രൗണ്ടില്‍ ശനിയാഴ്ച ആരംഭിച്ച ദ്വിദിന പരിപാടിയില്‍ സ്വയം പ്രഖ്യാപിത ആള്‍ദൈവം ധിരേന്ദ്ര കൃഷ്ണ ശാസ്ത്രിയുടെ പരിപാടിക്കിടെ േേമാഷണം നടന്നത്. 36 ഓളം അനുയായികള്‍ മോഷണത്തിനിരയായി. പരിപാടിയില്‍ പങ്കെടുത്തവരുടെ ആഭരണങ്ങളാണ് മോഷ്ടിക്കപ്പെട്ടത്. മാല ഉള്‍പ്പെടെയുള്ള സ്വര്‍ണാഭരണങ്ങള്‍ മോഷ്ടിക്കപ്പെട്ടതായി നിരവധിയാളുകള്‍ പൊലീസില്‍ പരാതിപ്പെട്ടു.
വലിയ വിലപിടിപ്പുള്ള സ്വര്‍ണാഭരണങ്ങളാണ് മോഷണം പോയത്. ഇക്കാര്യം പരിശോധിച്ചുവരികയാണെന്നും മീരാ റോഡ് പോലീസ് ഉദ്യോഗസ്ഥര്‍ പറഞ്ഞു. രണ്ട് ലക്ഷത്തിലധികം ഭക്തര്‍ പങ്കെടുത്ത ചടങ്ങില്‍ ഒരു സ്ത്രീക്ക് പരിക്കേറ്റു. തിരക്ക് കണക്കിലെടുത്ത് ഞായറാഴ്ച പോലീസ് വന്‍ സുരക്ഷയൊരുക്കിയിരുന്നു.ശാന്തബെന്‍ മിത്തലാല്‍ ജെയിന്‍ ചാരിറ്റബിള്‍ ട്രസ്റ്റ് സംഘടിപ്പിച്ച പരിപാടിയെ ചില അന്ധവിശ്വാസ വിരുദ്ധ സംഘടനകള്‍ എതിര്‍ത്തിരുന്നു. പരിപാടിക്ക് അനുമതി നല്‍കരുതെന്ന് ആവശ്യപ്പെട്ട് ഈ ഗ്രൂപ്പുകള്‍ വെള്ളിയാഴ്ച പോലീസിന് മെമ്മോറാണ്ടം നല്‍കിയിരുന്നു. തിക്കും തിരക്കിലും പരുക്കുണ്ടാകാതിരിക്കാനായി പോലീസിന്റെ ശ്രദ്ധ മാറിയതിനിടെയാണ് മോഷണം.
