ഇരിട്ടി : ഇരിട്ടിയിലെ പുതിയ ബസ് സ്റ്റാന്ഡിലെ അറ്റ്ലസ് ജ്വല്ലറിയില് നിന്ന് ഒന്നരപ്പവന്റെ മാല മോഷ്ടിച്ച യുവാവിനെ പോലീസ് പിടികൂടി. മാലൂര് തോലമ്പ്ര സ്വദേശി ഹരികൃഷ്ണനാണ് പിടിയിലായത്. കഴിഞ്ഞ ദിവസം ജ്വല്ലറിയില് നിന്ന് മാല തന്ത്രപൂര്വം മോഷ്ടിച്ച് കടന്നുകളയുകയായിരുന്നു.
പേരാവൂരില് കളത്തില് ജ്വല്ലറിയില് വില്പനക്കായി എത്തിയപ്പോള് ജ്വല്ലറിയുടമ ചില ചോദ്യങ്ങള് ഉന്നയിച്ചതോടെ ഹരികൃഷ്ണന് ഓടിപ്പോവുകയായിരുന്നു. നിരീക്ഷണ ക്യാമറയിലെ ദൃശ്യങ്ങളില് നിന്നാണ് പോലീസിന് ആളെ മനസ്സിലായത്. മാലൂരില് എത്തിയാണ് ഇരിട്ടി പ്രിന്സിപ്പല് എസ്.ഐ ദിനേശന് കൊതേരിയുടെ നേതൃത്വത്തിലുള്ള പോലീസ് സംഘം ഇയാളെ അറസ്റ്റ് ചെയ്തത്. ഇരിട്ടിയിലെ ജ്വല്ലറിയിലും തുടര്ന്ന് പേരാവൂര് ജ്വല്ലറിയിലും ഇയാളെ എത്തിച്ച് തെളിവെടുപ്പ് നടത്തി. മുന്പും ഇത്തരത്തില് ജ്വല്ലറികളില് നിന്നും സ്വര്ണം തട്ടിയെടുത്ത കേസിലെ പ്രതി കൂടിയാണ് ഹരികൃഷ്ണന് എന്ന് പോലീസ് പറഞ്ഞു.
