ഗൂഗിൾ പിക്സൽ 10 സീരീസ് നേടിയ വൻ വിജയത്തിന് ശേഷം, സ്മാർട്ട്ഫോൺ പ്രേമികൾ ഏറെ ആകാംക്ഷയോടെ കാത്തിരിക്കുന്നത് പിക്സൽ 11 സീരീസിന് വേണ്ടിയാണ്. പുതിയ പരമ്പരയിൽ ഗൂഗിൾ സ്വന്തമായി വികസിപ്പിച്ച കൂടുതൽ കരുത്തുറ്റ ടെൻസർ G6 ചിപ്സെറ്റ് അവതരിപ്പിക്കുമെന്നാണ് റിപ്പോർട്ടുകൾ സൂചിപ്പിക്കുന്നത്. മുൻതലമുറയിലെ ടെൻസർ G5-നേക്കാൾ മികച്ച പ്രകടനവും കാര്യക്ഷമതയും ഉറപ്പാക്കുന്ന രീതിയിലാണ് പുതിയ ചിപ്പിന്റെ നിർമ്മാണമെന്നാണ് പുറത്തുവരുന്ന വിവരങ്ങൾ.പുതിയ ടെൻസർ G6 ചിപ്സെറ്റിൽ ഏഴ് കോർ സിപിയു ഉണ്ടായിരിക്കുമെന്നാണ് സൂചന. ഇതിൽ 4.11GHz വരെ ക്ലോക്ക് സ്പീഡ് നൽകുന്ന പ്രൈം കോർ ഉൾപ്പെടുത്തിയത് ഫോണിന്റെ വേഗത വർധിപ്പിക്കാൻ സഹായിക്കും.
കൂടാതെ, പവർ വിആർ സി-സീരീസ് ജിപിയു കൂടി എത്തുന്നതോടെ ഗെയിമിംഗിലും ഗ്രാഫിക്സ് ജോലികളിലും ഫോൺ മികച്ച അനുഭവം നൽകും. പിക്സൽ 11, പിക്സൽ 11 പ്രോ, പിക്സൽ 11 പ്രോ എക്സ്എൽ എന്നീ മോഡലുകളിലായിരിക്കും ഈ ചിപ്സെറ്റ് പ്രധാനമായും ഉപയോഗിക്കുക. സാങ്കേതിക മികവിനൊപ്പം മികച്ച ഡിസ്പ്ലേയും ബാറ്ററി കരുത്തും ഈ ഫോണുകളിൽ പ്രതീക്ഷിക്കുന്നുണ്ട്. 6.3 ഇഞ്ച് എൽടിപിഓ അമോലെഡ് ഡിസ്പ്ലേ, 12GB റാം, 5,000mAh ബാറ്ററി തുടങ്ങിയ സവിശേഷതകൾ പിക്സൽ 11 മോഡലിനുണ്ടാകുമെന്ന് കരുതപ്പെടുന്നു. ക്യൂബ്സ്, ഗ്രിസ്ലി, കൊഡിയാക്ക് എന്നിങ്ങനെ രഹസ്യനാമങ്ങളിൽ അറിയപ്പെടുന്ന ഈ ഫോണുകൾ സ്മാർട്ട്ഫോൺ വിപണിയിൽ ഗൂഗിളിന്റെ കരുത്ത് വർധിപ്പിക്കുമെന്നാണ് വിലയിരുത്തപ്പെടുന്നത്.
