തിരുവനന്തപുരം: സര്ക്കാര് വാര്ഷികാഘോഷത്തിന് ഖജനാവില് തൊടരുതെന്ന് കെപിസിസി പ്രസിഡന്റ് കെ സുധാകരന്. കനത്ത നികുതികളും കടുത്ത സാമ്പത്തിക തകര്ച്ചയും ജനങ്ങള് നേരിടുമ്പോള് 50 കോടിയിലധികം രൂപ ഖജനാവില്നിന്നു മുടക്കി സര്ക്കാര് വാര്ഷികം ആഘോഷിക്കുന്നത് അത്താഴപ്പട്ടിണിക്കാരുടെ നെഞ്ചില് കയറിനിന്ന് ചവിട്ടുനാടകം കളിക്കുന്നതിന് തുല്യമാണെന്ന് സുധാകരന് കുറ്റപ്പെടുത്തി.
പിണറായി വിജയനെ തുടര്ച്ചയായി 60 ദിവസം സ്തുതിക്കാനും കാരണഭൂതന്റെ ചിത്രങ്ങളില് പാലഭിഷേകം നടത്താനും പൂച്ച പെറ്റുകിടക്കുന്ന ഖജനവില്നിന്ന് ഒരു രൂപപോലും ചെലവഴിക്കരുതെന്ന് സുധാകരന് ആവശ്യപ്പെട്ടു. കടത്തിനു മേല് കടം കയറ്റിവച്ച് നിത്യനിദാന ചെലവുപോലും നടത്തുന്നതിനിടയിലാണ് ആഘോഷം പൊടിപൊടിക്കുന്നത്. സംസ്ഥാനം ഇത്രയും വലിയ പ്രതിസന്ധിയില്ക്കൂടി കടന്നുപോകുമ്പോള്, സര്ക്കാരിന്റെ വാര്ഷികം ആഘോഷിക്കണമെന്ന് നിര്ബന്ധമുണ്ടെങ്കില് അതു പാര്ട്ടി ആസ്ഥാനത്ത് കെട്ടിവച്ചിരിക്കുന്ന പണം എടുത്തു മാത്രമേ ചെയ്യാവൂ എന്നും സുധാകരന് പറഞ്ഞു.
