കോന്നി : മഴയുടെ ശക്തി കുറഞ്ഞെങ്കിലും കോന്നിയില് ദുരിതം വിട്ടൊഴിഞ്ഞിട്ടില്ല. കനത്ത മഴയെയും വെള്ളപ്പൊക്കത്തെയും തുടര്ന്ന് റോഡുകളില് നിറയുന്ന ചരലുകളും ചെളിയും ഇപ്പോള് വാഹന യാത്രക്കാര്ക്ക് ഭീഷണിയായി മാറിയിരിക്കുകയാണ്. ഇരുചക്ര വാഹന യാത്രക്കാര് നിരവധി പേരാണ് റോഡില് നിരക്കുന്ന ചരലിലും ചെളിയിലും തെറ്റി വീണ് അപകടം സംഭവിക്കുന്നത്. റോഡിലേക്ക് മണ്ണും ചെളിയും ഒഴുകി എത്തുന്നത് റോഡ് തകര്ച്ചയ്ക്കും വഴിയൊരുക്കുന്നുണ്ട്.
ഇടറോഡുകളില് നിന്ന് പ്രധാന റോഡിലേക്ക് കയറുന്ന ഭാഗങ്ങളിലാണ് ഇത് ഏറെയും. റോഡില് നിറയുന്ന ചെളിയും മണ്ണും പലപ്പോഴും നീക്കം ചെയ്യാത്തത് മൂലം നിരവധി റോഡുകള് നാശാവസ്ഥയിലായിട്ടുണ്ട്. വാഹനങ്ങള് ബ്രേക്ക് ചെയ്യുമ്പോള് നിയന്ത്രണം വിട്ട് പോകുന്ന അവസ്ഥയും ഉണ്ടായിട്ടുണ്ട്. മലയോര മേഖലയിലെ റോഡുകളിലും ഇതാണ് അവസ്ഥ.
