തൃശ്ശൂര്‍: വില്‍പ്പനയ്ക്കായി അനധികൃതമായി കടത്തിക്കൊണ്ടുവന്ന രണ്ട് ആനക്കൊമ്പുമായി നാലുപേരെ തൃശ്ശൂര്‍ ഫോറസ്റ്റ് ഫ്ളൈയിങ് സ്‌ക്വാഡ് പിടികൂടി. ചെങ്ങന്നൂര്‍ ഉണ്ണികൃഷ്ണവിലാസം വീട്ടില്‍ കെ. മനോജ് (38), കൊല്ലം സ്വദേശി അനില്‍കുമാര്‍ (47), വടക്കാഞ്ചേരി ആലിംചിറയില്‍ എ.കെ. ബാബു (61), കൊടകര സ്വദേശി ഉമേഷ് (46) എന്നിവരാണ് പിടിയിലായത്.കഴിഞ്ഞ ദിവസം ഉച്ചയ്ക്ക് ആറാട്ടുപുഴ മന്ദാരക്കടവിന് സമീപത്തുനിന്നാണ് പ്രതികളെ പിടികൂടിയത്.
തിരുവനന്തപുരം ഫോറസ്റ്റ് ഇന്‍റലിജന്‍സിന്റെ രഹസ്യവിവരം ലഭിച്ചതിനെത്തുടര്‍ന്ന് തൃശ്ശൂര്‍ ഫ്ളൈയിങ് സ്‌ക്വാഡ് ജില്ലയില്‍ പലയിടത്തും പരിശോധന നടത്തിവരുകയായിരുന്നു. ഇതിനിടയിലാണ് ആറാട്ടുപുഴയിലെത്തിയ സംഘത്തെപ്പറ്റി വിവരമറിയുന്നത്. ഇവരെ ഏറെനേരത്തെ നിരീക്ഷണത്തിനൊടുവിലാണ് പിടികൂടിയത്. ഇവിടെ ആനക്കൊമ്ബ് വില്‍ക്കാനുള്ള ശ്രമത്തിലായിരുന്നെന്നും ഫ്ലൈയിങ് സ്‌ക്വാഡ് ഉദ്യോഗസ്ഥര്‍ പറഞ്ഞു.
