അഹമ്മദാബാദ്: ഗുജറാത്തിലെ കോണ്ഗ്രസ് എംഎല്എ ഇമ്രാന് ഖെഡാവാലയ്ക്ക് കൊവിഡ് സ്ഥിരീകരിച്ചു. ഇദ്ദേഹം ഇന്നലെ രാവിലെ ഗുജറാത്ത് മുഖ്യമന്ത്രി വിജയ് രുപാണിയുമായി കൂടിക്കാഴ്ച നടത്തിയിരുന്നു. ഇതിന് പുറമെ ഉപമുഖ്യമന്ത്രി നിതിന് പട്ടേല്, ആഭ്യന്തര സഹമന്ത്രി, മാധ്യമപ്രവര്ത്തകര് എന്നിവരേയും ഇമ്രാന് ഖേഡവാല കണ്ടിരുന്നു. കൊവിഡ് തീവ്രബാധിത പ്രദേശങ്ങളില് ബോധവത്കരണ പരിപാടികളില് എംഎല്എ പങ്കെടുത്തിരുന്നു. ഇന്നലെ വൈകീട്ടാണ് ഇദ്ദേഹത്തിന് കൊവിഡ് ബാധ സ്ഥിരീകരിച്ചത്.
രാജ്യത്ത് കൊവിഡ് രോഗികളുടെ എണ്ണം പതിനൊന്നായിരത്തിലേക്ക് കടക്കുകയാണ്. ഇപ്പോള് 10,815 പേരാണ് കൊവിഡ് രോഗം ബാധിച്ചത്. മരണം 353 ആയി. കര്ണാടകത്തില് കൊവിഡ് മരണം പത്തായി. ഇന്നലെ മാത്രം നാല് പേരാണ് സംസ്ഥാനത്ത് മരിച്ചത്. ബെംഗളൂരുവില് 38 കൊവിഡ് തീവ്രബാധിത പ്രദേശങ്ങളാണ് ഉള്ളത്. ആന്ധ്ര പ്രദേശില് ഇന്നലെ രണ്ട് പേര് കൂടി മരിച്ചതോടെ ആകെ മരണം ഒന്പതായി. തെലങ്കാനയില് 18 പേരാണ് ഇതുവരെ കൊവിഡ് ബാധിച്ച് മരിച്ചത്.
മെയ് മൂന്ന് വരെ ദേശീയ ലോക്ക്ഡൗണ് നീട്ടുന്നതിന്റെ ഭാഗമായി പുതുക്കിയ മാര്ഗ്ഗനിര്ദ്ദേശങ്ങള് കേന്ദ്ര സര്ക്കാര് ഇന്ന് പുറത്തിറക്കും. ഏപ്രില് ഇരുപതിന് ചില മേഖലകള്ക്ക് ഇളവ് നല്കുന്നതടക്കമുള്ള നിര്ദ്ദേശങ്ങള് ഇന്ന് കേന്ദ്രം നല്കും. ഇന്ന് കേന്ദ്ര മന്ത്രിസഭാ യോഗവും ചേരുന്നുണ്ട്. സാമ്പത്തിക പ്രതിസന്ധിയും മന്ത്രിസഭ ചര്ച്ച ചെയ്യും. ഇതരസംസ്ഥാന തൊഴിലാളികളുടെ പ്രതിഷേധം വിലയിരുത്താന് ആഭ്യന്തരമന്ത്രാലയത്തിലും യോഗം നടക്കും
