പത്തനംതിട്ട : ഗുരുവായൂര് – മലയാലപ്പുഴ കെ.എസ്.ആര്.റ്റി.സി ഫാസ്റ്റ് പാസഞ്ചര്, സര്വീസ് ആരംഭിച്ച് ഒരു മാസത്തിനുള്ളില് നിലച്ചു. രാവിലെ 7.30 ന് ഗുരുവായൂരില് നിന്നും പുറപ്പെട്ട് കൊടുങ്ങല്ലൂര്, വൈറ്റില, ചേര്ത്തല, തകഴി, ചക്കുളത്തുകാവ്, പത്തനംതിട്ട വഴി രണ്ട് മണിയോടെ മലയാലപ്പുഴയില് എത്തുന്ന രീതിയില് ആയിരുന്നു സര്വീസിന്റെ സമയം ക്രമീകരിച്ചിരുന്നത്. മലയാലപ്പുഴയില് നിന്നും വൈകിട്ട് മൂന്നുമണിയോടെ ഇതേ റൂട്ടില് മടങ്ങിയിരുന്നു.
മലയാലപ്പുഴ ക്ഷേത്ര ദര്ശനത്തിന് വടക്കന് ജില്ലകളില് നിന്ന് എത്തുന്നവര്ക്ക് ഈ സമയക്രമീകരണം പ്രയോജനം ചെയ്തിരുന്നില്ല. ഇവര് മലയാലപ്പുഴയില് എത്തുമ്പോഴേക്കും നട അടച്ചിരിക്കും. വൈകിട്ട് 5 മണിക്കാണ് പിന്നീട് നട തുറക്കുക. ഗുരുവായൂരില് നിന്നും പുറപ്പെടുന്നത് കുറച്ചു കൂടി നേരത്തെയാക്കി മലയാലപ്പുഴയില് രാവിലെ 11 മണിയോടെ എത്തി ചേര്ന്നാല് യാത്രക്കാര്ക്ക് ഇത് കൂടുതല് പ്രയോജനം ലഭിക്കുമായിരുന്നു. താത്കാലികമായി സര്വീസ് നിര്ത്തലാക്കിയതായാണ് കെ.എസ്.ആര്.റ്റി.സി പറയുന്നത്. സമയം പുനക്രമീകരിച്ച് ബസ് സര്വീസ് വീണ്ടും ആരംഭിക്കണം എന്നാണ് യാത്രക്കാരുടെ ആവശ്യം.
