തൃശൂര് : കൊവിഡ് വ്യാപനത്തെ തുടര്ന്ന് ഞായറാഴ്ച സംസ്ഥാനത്ത് കടുത്ത നിയന്ത്രണങ്ങള് ഏര്പ്പെടുത്തിയിരുന്നെങ്കിലും ഗുരുവായൂര് ക്ഷേത്രത്തില് ഇന്ന് നടന്നത് 145 വിവാഹങ്ങള്. നേരത്തെ ബുക്ക് ചെയ്തിരുന്ന വിവാഹങ്ങളാണ് ഇന്ന് നടന്നത്. 162 വിവാഹങ്ങളായിരുന്നു ഇന്നേ ദിവസം മുന്കൂട്ടി ബുക്ക് ചെയ്തിരുന്നതെങ്കിലും നിയന്ത്രണങ്ങള് കടുപ്പിച്ചതിനെ തുടര്ന്ന് 17 വിവാഹങ്ങള് റദ്ദാക്കിയിരുന്നു. പുലര്ച്ചെ അഞ്ച് മുതല് ഉച്ചപൂജ കഴിഞ്ഞ് ക്ഷേത്രത്തിന്റെ നടയടക്കുന്നത് വരെ വിവാഹങ്ങള് നടന്നു.
സംസ്ഥാനത്ത് കൊവിഡ് വ്യാപനത്തെ തുടര്ന്ന് ഏര്പ്പെടുത്തിയിരുന്ന നിയന്ത്രണങ്ങള്ക്ക് പുറമേ ദേവസ്വം ബോര്ഡും ക്ഷേത്രത്തിനുള്ളില് നിയന്ത്രണങ്ങള് ഏര്പ്പെടുത്തിയിരുന്നു. നിയന്ത്രണങ്ങളുടെ ഭാഗമായി ഫോട്ടോഗ്രാഫര്മാരടക്കം 12 പേര്ക്കാണ് വിവാഹമണ്ഡപത്തിനടുത്തേക്ക് പ്രവേശനം നല്കിയത്. എന്നിട്ട് പോലും പോലീസും സെക്യൂരിറ്റി ജീവനക്കാരും ഏറെ ബുദ്ധിമുട്ടിയാണ് തിരക്ക് നിയന്ത്രിച്ചത്.
