ചെന്നൈ : സേലത്ത് സര്ക്കാര് സ്കൂളിലെ പ്രധാനധ്യാപകനെ ബിയര് കുപ്പി പൊട്ടിച്ച് കുത്താന് ശ്രമിച്ച പ്ലസ്ടു വിദ്യാര്ഥിയെ പോലീസ് അറസ്റ്റ് ചെയ്തു. മാര്ച്ച് 26ന് സേലം ആത്തൂര് മഞ്ചിനി ഗവ. ഹൈസ്കൂളിലാണ് കേസിന്നാസ്പദമായ സംഭവം നടന്നത്.പ്രധാനധ്യാപകന് തന്റെ ഓഫീസിലേക്ക് വിളിപ്പിച്ച് തലക്ക് പിന്നില് വാലുപോലെ മുടി നീട്ടി വളര്ത്തിയ നിലയില് സ്കൂളില് വരാന് പാടില്ലെന്ന് അറിയിച്ചു.
പ്രകോപിതനായ വിദ്യാര്ഥി പ്രധാനാധ്യാപകനുമായി വാക്കുതര്ക്കത്തിലേര്പ്പെടുകയും മേശയിലുണ്ടായിരുന്ന ഓഫീസ് ഫയലുകള് ഉള്പ്പെടെയുള്ള സാധനങ്ങള് താഴേക്ക് തള്ളിയിടുകയും നശിപ്പിക്കുകയും ചെയ്തു. ബഹളം കേട്ട് അവിടെയെത്തിയ അധ്യാപകര് വിദ്യാര്ഥിയെ സമാധാനിപ്പിച്ചയച്ചു. പ്രശ്നത്തില് രക്ഷാകര്ത്തൃ ഭാരവാഹികളുമായി കൂടിയാലോചന നടത്തിയശേഷം വിദ്യാര്ഥിയോട് മാതാപിതാക്കളെ വിളിച്ചുകൊണ്ടുവരാനാവശ്യപ്പെട്ടു.
സ്കൂളിലെത്തിയ മാതാപിതാക്കളോട് പ്രിന്സിപ്പല് സംഭവം വിവരിച്ചു. ഈ സമയത്ത് വിദ്യാര്ഥി തന്റെ ബാഗില് സൂക്ഷിച്ചിരുന്ന ഒഴിഞ്ഞ ബിയര് കുപ്പി എടുത്ത് പൊട്ടിച്ച് പ്രധാനാധ്യാപകനെ കുത്താന് ശ്രമിച്ചു. താന് മാത്രമാണോ മുടി നീട്ടി വളര്ത്തുന്നതെന്നും മറ്റുള്ളവരെ എന്തുകൊണ്ട് വിളിച്ച് താക്കീത് ചെയ്യുന്നില്ലെന്നും പറഞ്ഞാണ് വിദ്യാര്ഥിയുടെ ആക്രോശം.
മറ്റു അധ്യാപകര് ഉടനടി വിദ്യാര്ഥിയെ തടയുകയായിരുന്നു. വിവരമറിഞ്ഞ് ആത്തൂര് പോലീസ് സ്കൂളിലെത്തി. പോലീസ് വിദ്യാര്ഥിയെ ഉപദേശിച്ചും താക്കീത് നല്കിയും വിട്ടയച്ചു. അതിനിടെ പ്രധാനധ്യാപകന്റെ മുറിയില് വിദ്യാര്ഥി ബഹളംവെക്കുന്നതിന്റെ വീഡിയോ സാമുഹിക മാധ്യമങ്ങളില് പ്രചരിച്ചു. തുടര്ന്നാണ് പോലീസ് വിദ്യാര്ഥിയെ അറസ്റ്റ് ചെയ്ത് ബാല ജയിലിലേക്ക് അയച്ചത്.
