റിയാദ്: ഇന്ത്യയില് നിന്നുള്ള ആദ്യ ഹജ്ജ് തീര്ത്ഥാടക സംഘം മക്കയിലെത്തി. 2,656 തീര്ത്ഥാടകര് ഉള്പ്പെട്ട സംഘമാണ് മക്കയിലെത്തിയത്. മദീനയില് ആദ്യമെത്തി അവിടെ സന്ദര്ശനം പൂര്ത്തിയാക്കിയാണ് ഇവര് മക്കയിലെത്തിയത്. ഹജ്ജ് മിഷനും നൂറുകണക്കിന് വരുന്ന സന്നദ്ധ സംഘടനാ പ്രവര്ത്തകരും ചേര്ന്ന് ഹാജിമാരെ ഊഷ്മളമായി സ്വീകരിച്ചു. ചൊവ്വാഴ്ച വൈകീട്ട് 6.30 മണിയോടെയാണ് ഹാജിമാര് മക്കയിലെത്തിയത്. വലിയ സ്വീകരണമാണ് മക്കയില് ലഭിച്ചത്.
2,656 ഹാജിമാരാണ് ആദ്യ സംഘത്തിലുള്ളത്. മദീനയില് എട്ട് ദിന സന്ദര്ശനം പൂര്ത്തിയാക്കിയെത്തിയ ഹാജിമാരെ സ്വീകരിക്കാന് ജിദ്ദ ഇന്ത്യന് കോണ്സല് ജനറല് മുഹമ്മദ് ഷാഹിദ് ആലം, പത്നി ഡോ. ഷക്കീല ഷാഹിദ്, ഹജ്ജ് കോണ്സല് അബ്ദുല് ജലീല്, മറ്റ് ഉദ്യോഗസ്ഥര് എന്നിവര് എത്തിയിരുന്നു. വനിതകളും കുട്ടികളും ഉള്പ്പെടെ വിവിധ സംഘടനാ വളണ്ടിയര്മാര് ഭക്ഷണവും മധുരവും സമ്മാനപ്പൊതികളുമായി ഹാജിമാരെ വരവേറ്റു.
