റാന്നി: ശബരിമല തിരുവാഭരണ ഘോഷയാത്രയ്ക്ക് ശേഷം ഘോഷയാത്ര കടന്നുവന്ന പാതയിലുടനീളം ഉപേക്ഷിക്കപ്പെട്ട പ്ലാസ്റ്റിക് ബോട്ടിലുകളും ആഹാരപദാർത്ഥ കവറുകളും ഉൾപ്പെടെയുള്ള മാലിന്യങ്ങൾ ഹരിത കർമ്മ സേന അംഗങ്ങൾ നീക്കം ചെയ്തു. റാന്നി ഗ്രാമ പഞ്ചായത്തിലെ ഹരിതകര്മ്മ സേനാംഗങ്ങളാണ് മാലിന്യം നീക്കം ചെയ്തു പാത വൃത്തിയാക്കിയത്. ആദ്യഘട്ടമായി ആയിക്കൽ മുതൽ ആരംഭിക്കുന്ന ഭാഗങ്ങളിലാണ് ശുചീകരണ പ്രവർത്തനങ്ങൾ പൂർത്തിയാക്കിയത്. രണ്ടാംഘട്ടമായി ഉതിമൂട് മുതൽ ഉള്ള പ്രദേശങ്ങൾ വൃത്തിയാക്കുമെന്നും റാന്നി ഗ്രാമപഞ്ചായത്ത് പ്രസിഡന്റ് ശശികല രാജശേഖരൻ അറിയിച്ചു.
തിരുവാഭരണ ഘോഷയാത്രയ്ക്ക് ശേഷം വഴിയരികുകളിൽ വലിയ തോതിൽ പ്ലാസ്റ്റിക് ഉൾപ്പെടെയുള്ള മാലിന്യങ്ങൾ കിടക്കുന്നത് ശ്രദ്ധയിൽപ്പെട്ടതിനെ തുടർന്ന് പഞ്ചായത്ത് ഉടൻ തന്നെ നടപടി സ്വീകരിക്കുകയായിരുന്നു. ശുചിത്വത്തിനും പരിസ്ഥിതി സംരക്ഷണത്തിനും ഒരുപോലെ പ്രാധാന്യം നൽകുന്നതിനും നാടിന്റെ സൗന്ദര്യം കാത്തുസൂക്ഷിക്കുക എന്ന സന്ദേശം ശക്തമായി മുന്നോട്ടുവെയ്ക്കുന്നതാണ് റാന്നി ഗ്രാമപഞ്ചായത്തിലെ ഹരിത കർമ്മ സേന അംഗങ്ങളുടെ ഈ പ്രവർത്തികൾ കൊണ്ട് ലക്ഷ്യം വെയ്ക്കുന്നത് എന്നും പ്രസിഡന്റ് പറഞ്ഞു.
