കോന്നി : സുസ്ഥിര വികസന ലക്ഷ്യങ്ങൾ കൈവരിക്കുന്നതിനായി കോന്നി ബ്ലോക്ക് പഞ്ചായത്തും ജൈവ വൈവിധ്യ വികസന സമിതിയും സംയുക്തമായി നടപ്പാക്കുന്ന ഹരിതായനം 2026 പദ്ധതിയുടെ ആദ്യ ഐ.ഇ.സി. (വിവര, വിദ്യാഭ്യാസ, ആശയവിനിമയം) പരിപാടിക്ക് തുടക്കമായി. കോന്നി ബ്ലോക്ക് പഞ്ചായത്ത് പ്രസിഡന്റ് റോബിൻ പീറ്റർ പദ്ധതിയുടെ ഉദ്ഘാടനവും ലോഗോ പ്രകാശനവും നിർവഹിച്ചു.
ഹൈസ്കൂൾ, ഹയർ സെക്കൻഡറി, കോളേജ് തലങ്ങളിലെ വിദ്യാർത്ഥികൾക്കായി പ്രസംഗമത്സരം, കഥാരചന, കവിതാ രചന, ഉപന്യാസ മത്സരം, ക്വിസ് മത്സരം എന്നിവ സംഘടിപ്പിച്ചു. കോന്നി ബ്ലോക്ക് പഞ്ചായത്ത് പരിധിയിലെ സ്കൂളുകളിൽ നിന്നും കോളേജുകളിൽ നിന്നുമായി നാൽപ്പതോളം വിദ്യാർത്ഥികൾ മത്സരങ്ങളിൽ പങ്കെടുത്തു. ജനപ്രതിനിധികൾ, ബ്ലോക്ക് പഞ്ചായത്ത് ഉദ്യോഗസ്ഥർ, വനം വകുപ്പ് ഉദ്യോഗസ്ഥർ, ജൈവ വൈവിധ്യ വികസന സമിതി അംഗങ്ങൾ എന്നിവരും പരിപാടിയിൽ പങ്കെടുത്തു.
