കൊച്ചി :കണ്ണൂര് സര്വകലാശാല ബോര്ഡ് ഓഫ് സ്റ്റഡീസ് അംഗങ്ങളുടെ നിയമനം റദ്ദാക്കി. ഹൈക്കോടതി ഡിവിഷന് ബെഞ്ചിന്റേതാണ് തീരുമാനം. ഗവര്ണറുടെ സത്യവാങ്മൂലം അംഗീകരിച്ചാണ് ഹൈക്കോടതിയുടെ നടപടി. എതിര്കക്ഷികളായ ബോര്ഡ് ഓഫ് സ്റ്റഡീസ് അംഗങ്ങള്ക്കു നോട്ടിസ് നല്കാനും കോടതി നിര്ദേശിച്ചിരുന്നു. നിയമപ്രകാരം ബോര്ഡ് ഓഫ് സ്റ്റഡീസ് ചെയര്മാനെയും അംഗങ്ങളെയും നോമിനേറ്റ് ചെയ്യേണ്ടതു ചാന്സലറാണെന്നും നിയമനം നടത്തേണ്ടതു സിന്ഡിക്കേറ്റാണെന്നുമാണ് ഗവര്ണര് വിശദീകരിച്ചത്. വൈസ് ചാന്സലറുടെ ശിപാര്ശയുടെ അടിസ്ഥാനത്തിലാണ് മുന്പു ബോര്ഡ് ഓഫ് സ്റ്റഡീസ് രൂപീകരിച്ചിരുന്നതെന്നും നിലവിലെ വൈസ് ചാന്സലറും മുന്പു ശുപാര്ശ നല്കിയിരുന്നെന്നും ഗവര്ണര് വ്യക്തമാക്കിയിരുന്നു.
ചാന്സലറുടെ അധികാരം കവര്ന്നാണ് കണ്ണൂര് സര്വകലാശാലയിലെ ബോര്ഡ് ഓഫ് സ്റ്റഡീസ് അംഗങ്ങളുടെ നിയമനം നടത്തിയിരിക്കുന്നതെന്നും യോഗ്യതയില്ലാത്തവരെ നിയമിച്ചെന്നും ചൂണ്ടിക്കാട്ടി സര്വകലാശാലാ സെനറ്റ് അംഗം വി.വിജയകുമാര്, അക്കാദമിക് കൗണ്സില് അംഗം ഡോ.ഷിനോ പി ജോസ് എന്നിവര് നല്കിയ ഹര്ജി സിംഗിള് ബെഞ്ച് തള്ളിയതിനെ തുടര്ന്നാണ് ഡിവിഷന് ബെഞ്ചില് അപ്പീല് നല്കിയത്. നിയമനം സര്വകലാശാലാ നിയമങ്ങള്ക്കും ചട്ടങ്ങള്ക്കും അനുസൃതമല്ലെന്നു ചൂണ്ടിക്കാട്ടിയാണ് ജനുവരിയില് ഹൈക്കോടതി ഇടക്കാല ഉത്തരവ് പുറപ്പെടുവിച്ചത്.
നിയമനം ചട്ടവിരുദ്ധമാണെന്ന് ഗവര്ണര് ആരിഫ് മുഹമ്മദ് ഖാന് ഹൈക്കോടതിയില് നല്കിയ സത്യവാങ്മൂലത്തില് വ്യക്തമാക്കിയിരുന്നു. സിന്ഡിക്കേറ്റ് നേരിട്ട് നിയമനം നടത്തുകയായിരുന്നുവെന്നും ഗവര്ണര് കോടതിയെ അറിയിച്ചു. ചാന്സലറായ ഗവര്ണറുടെ വിശദീകരണവും പരിഗണിച്ചായിരുന്നു അപ്പീലില് ചീഫ് ജസ്റ്റിസ് എസ്.മണികുമാര്, ജസ്റ്റിസ് ഷാജി പി ചാലി എന്നിവരുള്പ്പെട്ട ഡിവിഷന് ബെഞ്ച് ഇടക്കാല ഉത്തരവ് പുറപ്പെടുവിച്ചത്.
വിവിധ സര്വകലാശാലകളില് ബോര്ഡ് ഓഫ് സ്റ്റഡീസ് അംഗങ്ങളെ നിയമിക്കുന്നതില് സിന്ഡിക്കറ്റിന്റെയും ചാന്സലറുടെയും അധികാരവും നിയമന രീതിയും വിശദമാക്കുന്ന പട്ടിക ഹര്ജിക്കാര്ക്കുവേണ്ടി മുതിര്ന്ന അഭിഭാഷകന് ജോര്ജ് പൂന്തോട്ടം സമര്പ്പിച്ചിരുന്നു. ബോര്ഡ് ഓഫ് സ്റ്റഡീസ് അംഗങ്ങളെ ഗവര്ണറുടെ നാമനിര്ദേശം ഇല്ലാതെ സിന്ഡിക്കറ്റ് തന്നെ നേരിട്ടു നിയമിക്കുന്നതിനുള്ള ചട്ട ഭേദഗതി നിര്ദേശം കഴിഞ്ഞ സിന്ഡിക്കറ്റ് യോഗം അംഗീകരിച്ചതുമാണ്. ഈ തീരുമാനം ഗവര്ണര്ക്ക് അയച്ചെങ്കിലും അദ്ദേഹം ഒപ്പിട്ടില്ല. ചാന്സലര് പദവി ഒഴിയുന്നതായി ഗവര്ണര് പ്രഖ്യാപിച്ച ശേഷമായിരുന്നു സിന്ഡിക്കറ്റ് നീക്കം.
