കൊച്ചി: ദേശീയപാതയിലെ കുഴിയില് വീണ് ബൈക്ക് യാത്രികന് മരിച്ച സംഭവത്തില് ഇടപെട്ട് ഇടപെട്ട് ഹൈക്കോടതി. ദേശീയപാതകളിലെ കുഴികളടയ്ക്കാന് ജസ്റ്റിസ് ദേവന് രാമചന്ദ്രന് കര്ശന നിര്ദേശം നല്കി.
എന്.എച്ച്.എ.ഐ കേരള റീജിയണല് ഓഫീസര്ക്കും പ്രോജക്ട് ഡയറക്ടര്ക്കും ആണ് നിര്ദേശം നല്കിയത്. അമിക്കസ്ക്യൂറി വഴിയാണ് നിര്ദേശം നല്കിയത്. റോഡുകളുമായി ബന്ധപ്പെട്ട ഹര്ജികള് തിങ്കളാഴ്ച കോടതി പരിഗണിക്കും.
നെടുമ്പാശേരി റോഡിലെ കുഴിയില് വീണ് ബൈക്ക് യാത്രികന് മരിച്ച സംഭവത്തില് പ്രതികരണവുമായി ഹാഷിമിന്റെ കുടുംബം രംഗത്തെത്തിയിരുന്നു. അധികൃതരുടെ ഭാഗത്തുനിന്നുണ്ടായ അനാസ്ഥയാണ് മരണത്തിന് കാരണമെന്ന് ഹാഷിമിന്റെ കുടുംബം പറഞ്ഞു.
മനുഷ്യന്റെ ജീവന് അധികൃതര് വിലകല്പ്പിക്കുന്നില്ല. കുഴി അടയ്ക്കണമെന്ന് പഞ്ചായത്ത് നേരത്തെ ആവശ്യപ്പെട്ടിരുന്നു. നാഷണല് ഹൈവേയുടെ ശ്രദ്ധ കുറവാണ് അപകടത്തിന് കാരണം. ഹാഷിം സ്ഥിരമായി വരുന്ന വഴി ആണ്. ഇനി ഒരാള്ക്കും ഇങ്ങനെ ഒരു അപകടം ഉണ്ടാകരുതെന്നും അതിന് ആവശ്യമായ നടപടികള് അധികൃതര് സ്വീകരിക്കണമെന്നും കുടുംബം ആവശ്യപ്പെട്ടു.
നെടുമ്പാശേരി എം എ എച്ച് എസ് സ്കൂളിന് സമീപമാണ് അപകടം ഉണ്ടായത്. അപകടത്തില് പറവൂര് മാഞ്ഞാലി മനയ്ക്കപ്പടി താമരമുക്ക് അഞ്ചാംപരുത്തിക്കല് വീട്ടില് എ എ ഹാഷിമാണ് (52) മരിച്ചത്. ഹോട്ടല് ഉടമയാണ് മരിച്ച ഹാഷിം. വെള്ളിയാഴ്ച രാത്രി ഹോട്ടല് പൂട്ടി വീട്ടിലേക്ക് മടങ്ങവേയായിരുന്നു അപകടം. റോഡിലെ കുഴിയില് വീണ ഹാഷിം സമീപത്തേക്ക് തെറിച്ച വീഴുകയും ഈ സമയം പിന്നില് വന്ന വാഹനം ദേഹത്ത് കയറിയിറങ്ങുകയുമായിരുന്നു. തല്ക്ഷണം മരണം സംഭവിച്ചു. കുഴിയില് വെളളം കെട്ടി കിടന്നതിനാല് കുഴി കാണാനാകാത്ത സ്ഥിതിയിലായിരുന്നു.
