കൊച്ചി: ഡോക്ടര് വന്ദന ദാസ് കൊല്ലപ്പെട്ട സംഭവത്തില് സംസ്ഥാന പോലീസ് മേധാവിയോട് ഹൈക്കോടതി റിപ്പോര്ട്ട് തേടി. നാളെ രാവിലെ തന്നെ റിപ്പോര്ട്ട് സമര്പ്പിക്കണം. പോലീസ് മേധാവി ഓണ്ലൈനായി കോടതിയില് ഹാജരാകണമെന്നും കോടതി വ്യക്തമാക്കി. നാളെ രാവിലെ 10ന് കേസ് കോടതി വീണ്ടും പരിഗണിക്കും. വന്ദന നമ്മുടെ മകളാണെന്നും സംഭവം ഏറെ ദുഃഖകരമാണെന്നും കോടതി പറഞ്ഞു. ഡോക്ടര്മാര്ക്കു നേരെ അക്രമം ആവര്ത്തിക്കുമ്പോഴും സുരക്ഷയൊരുക്കാന് സര്ക്കാരിന് കഴിയാത്തത് എന്തുകൊണ്ടെന്ന് ഹൈക്കോടതി.
പോലീസിന്റെ കൈയ്യില് തോക്കില്ലേയെന്നും സാഹചര്യങ്ങള് മുന്കൂട്ടി കണ്ടു പ്രവര്ത്തിക്കാന് പോലീസിന് കഴിയണമെന്നും ജസ്റ്റിസുമാരായ ദേവന് രാമചന്ദ്രനും കൗസര് എടപ്പഗത്തും അടങ്ങിയ ബെഞ്ച് അഭിപ്രായപ്പെട്ടു. ഡോക്ടര്മാരെ സംരക്ഷിക്കാന് കഴിയുന്നില്ലെങ്കില് ആശുപത്രികള് അടച്ചുപൂട്ടുകയാണ് വേണ്ടതെന്ന് കോടതി പറഞ്ഞു.
