പെരിന്തല്മണ്ണ: പെരിന്തല്മണ്ണ നഗരസഭയിലെ കരാറുകാര്ക്ക് കുടിശിക തുക നല്കാന് ഹൈക്കോടതി ഉത്തരവ്. ഹൈക്കോടതിയെ സമീപിച്ച മൂന്ന് കരാറുകാര്ക്ക് മാത്രം 2,35,99,910 രൂപയാണ് നല്കാനുള്ളത്. ആകെത്തുകയുടെ 50 ശതമാനം മൂന്ന് മാസത്തിനകവും ബാക്കിത്തുക അടുത്ത മൂന്നുമാസത്തിനകവും നല്കാനാണ് ഉത്തരവ്.
കരാറുകാരായ ടി. മുഹമ്മദ് ഷഫീക്കിന്(17 പ്രവൃത്തികള്) 1,56,72,282 രൂപയും ടി. മുഹമ്മദ് റഫീക്കിന്(ആറ് പ്രവൃത്തികള്) 23,26,559 രൂപയും എം. ഹസ്കറിന്(12 പ്രവൃത്തികള്) 56,01,069 രൂപയുമാണ് നല്കാനുള്ളത്. 2020-21 കാലത്തെ പ്രവൃത്തികളുടെ ബില്ലുകളാണിവ. നഗരസഭ ബില് തുക നല്കാതെയായതോടെയാണ് കരാറുകാര് ഹൈക്കോടതിയെ സമീപിച്ചത്.
വ്യാഴാഴ്ച നടന്ന കൗണ്സില് യോഗത്തിലെ അജന്ഡയിലാണ് കോടതി ഉത്തരവ് സംബന്ധിച്ച വിവരങ്ങളുള്ളത്. ഓഡിറ്റ് റിപ്പോര്ട്ടില് പരാമര്ശിച്ച പദ്ധതികള് ഇവയിലുണ്ടെങ്കില് അക്കാര്യം പരിശോധിക്കണമെന്നും ഹൈക്കോടതിയില് ഈ വിവരം ബോധിപ്പിക്കണമെന്നും പ്രതിപക്ഷാംഗങ്ങള് ആവശ്യപ്പെട്ടു. കഴിഞ്ഞ ഭരണസമിതിയുടെ പിടിപ്പുകേടിന്റെ പരിണിതഫലമാണെന്നും ഇവര് ആരോപിച്ചു. വിഷയത്തില് നഗരസഭയുടെ ധനസ്ഥിതി കോടതിയെ ബോധ്യപ്പെടുത്താനും കഴിയുമെങ്കില് അപ്പീല് നല്കുന്നത് പരിശോധിക്കുമെന്നും ചെയര്മാന് വിശദീകരിച്ചു. സംസ്ഥാനത്തെ നഗരസഭകള്ക്കാകെയുണ്ടായ പ്രതിസന്ധിയാണ് പെരിന്തല്മണ്ണയിലുണ്ടായതെന്നും കരാറുകാരുമായി ചര്ച്ച നടത്തുമെന്നും അദ്ദേഹം അറിയിച്ചു.
