തിരുവനന്തപുരം : സംസ്ഥാനത്ത് കൂടുതല് കുരങ്ങുവസൂരി കേസുകള് സ്ഥിതീകരിക്കുന്ന സാഹചര്യത്തില് ജാഗ്രത കര്ശനമാക്കി ആരോഗ്യവകുപ്പ്. ഇന്നലെ മലപ്പുറം സ്വദേശിയായ ഒരാള്ക്ക് കൂടി രോഗം സ്ഥിരീകരിച്ചതോടെ ആകെ രോഗികള് മൂന്നായി. കൊല്ലം,കണ്ണൂര് ജില്ലകളിലാണ് മറ്റ് രണ്ട് രോഗികളുള്ളത്. സംസ്ഥാനത്ത് രോഗം സ്ഥിരീകരിച്ച മൂന്ന് പേരും യുഎഇയില് നിന്ന് എത്തിയവരായതിനാല് ഇവിടെ നിന്നുള്ള യാത്രക്കാര് കൂടുതല് ജാഗ്രത പാലിക്കണമെന്നാണ് നിര്ദേശം.
നാല് വിമാനത്താവളങ്ങളിലും അന്താരാഷ്ട്ര യാത്രക്കാരെ നിരീക്ഷിക്കാനുള്ള സംവിധാനം നിലവിൽ ഏർപ്പെടുത്തിയിട്ടുണ്ട്. രോഗികളുടെ സമ്പർക്കപ്പട്ടികയിൽ ഉള്ളവരുടെ പരിശോധഫലം നെഗറ്റീവാകുന്നതിന്റെ ആശ്വാസത്തിലാണ് ആരോഗ്യവകുപ്പ്. അവസാനം രോഗം സ്ഥിരീകരിച്ച 35കാരന്റെ സമ്പർക്കത്തിലുണ്ടായിരുന്നവരെ നിലവിൽ നിരീക്ഷണത്തിലാക്കിയിട്ടുണ്ട്. ഇയാളുൾപ്പടെ രോഗം സ്ഥിരീകരിച്ച മൂന്ന് പേരുടെയും ആരോഗ്യനില തൃപ്തികരമാണ്.
