പത്തനംതിട്ട : പത്തനംതിട്ട നഗരത്തില് ചൂട് വര്ദ്ധിച്ചതോടെ വെന്തുരുകുകയാണ് നഗരത്തില് എത്തുന്നവര്. ചുമട്ടുതൊഴിലാളികളും ഓട്ടോറിക്ഷ തൊഴിലാളികളും നിര്മ്മാണ പ്രവര്ത്തനങ്ങളില് ഏര്പ്പെട്ടിരിക്കുന്നവരുമാണ് ഏറ്റവും കൂടുതല് ചൂടിന്റെ കാഠിന്യമറിയുന്നത്. നഗരത്തിലെ വ്യാപാര സ്ഥാപനങ്ങളിലെ ജീവനക്കാരും കച്ചവടക്കാരും ഈ പ്രതിസന്ധി നേരിടുന്നുണ്ട്. പകല് സമയങ്ങളില് ആളുകള് പുറത്തിറങ്ങാന് പറ്റാതെ വന്നതോടെ വ്യാപാര സ്ഥാപനങ്ങളിലെ കച്ചവടവും കുത്തനെ കുറഞ്ഞു. പത്തനംതിട്ട അബാന് മേല്പാലം നിര്മാണം നടക്കുന്നതിനാല് നഗരത്തില് പൊടിശല്യവും വര്ധിച്ചിട്ടുണ്ട്.
കൊച്ചുകുഞ്ഞുങ്ങളുമായി നഗരത്തിലെത്തുന്ന ആളുകള് തണല് തേടി അലയുന്ന കാഴ്ചയാണ് ഇപ്പോള് കാണുന്നത്. നഗരത്തിലെവിടെയും തണല് മരങ്ങളോ വെയില് കൊള്ളാതെയിരിക്കുവാനുള്ള സംവിധാനമോ ഇല്ലാത്തത് വലിയ പോരായ്മയായി അവശേഷിക്കുന്നു. പൊടിക്കാറ്റ് രൂക്ഷമായതോടെ ഇത് കുറയ്ക്കുവാന് ആവശ്യമായ യാതൊരു നടപടിയും നഗരസഭയും സ്വീകരിച്ചിട്ടില്ല.
