തിരുവനന്തപുരം/പാലക്കാട്: ചൂട് വർധിച്ചതോടെ പാലക്കാട് ഉഷ്ണതരംഗം പ്രഖ്യാപിച്ച് കേന്ദ്ര കാലാവസ്ഥ നിരീക്ഷണകേന്ദ്രം. വെള്ളിയാഴ്ച വൈകീട്ട് 5.30-നായിരുന്നു പ്രഖ്യാപനം. സംസ്ഥാനത്തുതന്നെ ഇതാദ്യമായാണ് ഏതെങ്കിലുമൊരു പ്രദേശത്ത് ഉഷ്ണതരംഗം പ്രഖ്യാപിക്കുന്നത്. 2016-ലും 2019-ലും ഉഷ്ണതരംഗ മുന്നറിയിപ്പുണ്ടായിരുന്നെങ്കിലും ഇത്തരം പ്രഖ്യാപനം നടന്നിരുന്നില്ല. കൊല്ലം, തൃശ്ശൂർ ജില്ലകളിലും ഉഷ്ണതരംഗത്തിന് സാധ്യതയുണ്ടെന്ന മുന്നറിയിപ്പുമുണ്ട്. ഈ ജില്ലകളിൽ താപനില 40 ഡിഗ്രി സെൽഷ്യസ് വരെ ഉയരാം. ഇതേ ചൂട് വരുംദിവസങ്ങളിലും നിലനിന്നാൽ ഉഷ്ണതരംഗം പ്രഖ്യാപിക്കും. കൊല്ലം പുനലൂരിലും തൃശ്ശൂർ വെള്ളാനിക്കരയിലും 38 ഡിഗ്രിയാണ് ശനിയാഴ്ച രേഖപ്പെടുത്തിയത്.
വേനൽമഴ കാര്യമായി പെയ്യാനും സാധ്യതയില്ലാത്തനിലാൽ അടുത്തെങ്ങും ഉഷ്ണം ശമിക്കില്ല. ഈ ജില്ലകൾക്കുപുറമേ, ഒമ്പത് ജില്ലകളിൽക്കൂടി മേയ് ഒന്നുവരെ ഉയർന്നചൂടുണ്ടാവും. കോഴിക്കോട്ടും കണ്ണൂരും 38 ഡിഗ്രിവരെയും ആലപ്പുഴ, കോട്ടയം, എറണാകുളം, മലപ്പുറം, കാസർകോട്, പത്തനംതിട്ട എന്നിവിടങ്ങളിൽ 37 ഡിഗ്രിവരെയും തിരുവനന്തപുരത്ത് 36 ഡിഗ്രിവരെയും താപനില ഉയരാം.
