തിരുവനന്തപുരം : കനത്ത മഴ തുടരുന്നതിനാല് കോട്ടയം, ആലപ്പുഴ, പത്തനംതിട്ട ജില്ലകളില് വിദ്യാഭ്യാസ സ്ഥാപനങ്ങള്ക്ക് നാളെ അവധി. പ്രഫഷനല് കോളേജുകള് ഉള്പ്പെടെയുളള സ്ഥാപനങ്ങള്ക്ക് അവധി ബാധകം. എം.ജി സര്വകലാശാല നാളെ നടത്താനിരുന്ന പരീക്ഷകള് മാറ്റി. പുതുക്കിയ തീയതി പിന്നീട് അറിയിക്കും. സംസ്ഥാനത്ത് കനത്ത മഴ തുടരുന്നു. എല്ലാ ജില്ലകളിലും അതീവ ജാഗ്രതപാലിക്കാന് കാലാവസ്ഥാവകുപ്പ് നിര്ദേശം നല്കി.
വരുന്ന രണ്ടു ദിവസം കൂടി കേരളത്തില് വ്യാപകമായി മഴ കിട്ടും. അറബിക്കടലിലും ബംഗാള് ഉള്ക്കടലിലും നിലനില്ക്കുന്ന ന്യൂനമര്ദവും ചക്രവാത ചുഴിയുമാണ് മഴ ശക്തമായി തുടരാന് കാരണമായത്. സംസ്ഥാനത്ത് വരുന്ന രണ്ടു ദിവസം കൂടിയെങ്കിലും ശക്തമായ മഴ തുടരുമെന്നാണ് കാലാവസ്ഥാ മുന്നറിയിപ്പ്. വ്യാഴാഴ്ച വരെ പരക്കെ മഴക്കും സാധ്യതയുണ്ട്. എറണാകുളം, ഇടുക്കി, തൃശൂര്, കോഴിക്കോട്, കണ്ണൂര്, കാസര്കോട് ജില്ലകളിലാണ് ഓറഞ്ച് അലര്ട്ട് നിലവിലുള്ളത്, മറ്റെല്ലാ ജില്ലകളിലും യെലോ അലര്ട്ടും നല്കിയിട്ടുണ്ട്. അതിശക്തമായ മഴക്ക് സാധ്യതയുള്ളതിനാല് അതീവ ജാഗ്രത പാലിക്കാനാണ് നിര്ദേശം. മണിക്കൂറില് 60 കിലോമീറ്റര്വരെ വേഗതയുള്ള കാറ്റിനിടയുണ്ട്. മത്സ്യതൊഴിലാളികള് കടലില് പോകരുത്.
ബംഗാള് ഉള്ക്കടലില് ആന്ഡമാന് ദ്വീപിന് സമീപം നിലനില്ക്കുന്ന ന്യൂനമര്ദം കൂടുതല് തീവ്രത കൈവരിച്ച് തമിഴ്നാട്, ആന്ധ്ര തീരത്തേക്ക് നീങ്ങുകയാണ്. കൂടാതെ അറബികടലില് ചക്രവാത ചുഴിയുണ്ട്. ഗോവ , മഹാരാഷ്ട്ര തീരത്തിനടുത്ത് ന്യൂനമര്ദം രൂപപ്പെടാനും സാധ്യതയുണ്ടെന്ന് കാലാവസ്ഥാ വകുപ്പ് അറിയിച്ചു. ആവര്ത്തിക്കുന്ന ന്യൂനമര്ദങ്ങളും ചക്രവാത ചുഴികളും കേരളത്തില് ഒക്ടോബര്, നവംബര് മാസങ്ങളില് അസാധാരണമായ മഴക്ക് കാരണമായി എന്നും കേന്ദ്ര കാലാവസ്ഥ കേന്ദ്രം .
