പത്തനംതിട്ട : ഹെല്മെറ്റിലെ ക്യാമറക്ക് പിഴ ഈടാക്കാനുള്ള മോട്ടോര് വാഹന വകുപ്പിന്റെ തീരുമാനത്തിനെതിരെ സോഷ്യല് മീഡിയയില് വന് പ്രതിഷേധം. മോട്ടോര് വാഹന വകുപ്പിന്റെ ഫെയിസ് ബുക്ക് പേജിലും തെറിയഭിഷേകംകൊണ്ട് നിറയ്ക്കുകയാണ് പ്രതിഷേധക്കാര്. പോലീസിന്റെയും മോട്ടോര് വാഹന വകുപ്പിന്റെയും അഴിമതിയും തെറ്റായ നടപടികളും മിക്കപ്പോഴും പുറത്തുകൊണ്ടുവന്നിട്ടുള്ളത് ഇത്തരം ക്യാമറ ദൃശ്യങ്ങളാണ്. അതുകൊണ്ടുതന്നെ ഇതിന് വന് തുക പിഴ ചുമത്തി ക്യാമറ ഒഴിവാക്കുവാനാണ് ഉദ്യോഗസ്ഥരുടെ നീക്കം.
ഹെല്മെറ്റ് തുളച്ചാണ് ക്യാമറ പിടിപ്പിക്കുന്നതെന്നും ഇത് സുരക്ഷിതത്വം ഇല്ലാതാക്കുമെന്നുമാണ് മോട്ടോര് വാഹന വകുപ്പിന്റെ വാദം. എന്നാല് ബഹുഭൂരിപക്ഷം പേരും ക്യാമറ ഹെല്മെറ്റില് താല്ക്കാലികമായി ഒട്ടിച്ചു വെക്കുകയാണ്. ഇത് മറച്ചുവെച്ചുകൊണ്ടാണ് ഇപ്പോള് മോട്ടോര് വാഹന വകുപ്പിന്റെ നടപടി. സര്ക്കാരിന്റെ ഖജനാവ് നിറക്കുവാനുള്ള മറ്റൊരു വഴിയാണ് ഇതെന്നും പിഴയുടെപേരില് ജനങ്ങളെ പിഴിയുകയാണെന്നും ജനങ്ങള് പ്രതികരിക്കുന്നു.
