പത്തനംതിട്ട : പരിസ്ഥിതി ദിനത്തിൽ വൃക്ഷത്തൈകൾ പിഴുതെറിഞ്ഞ് വേറിട്ട പ്രതിഷേധവുമായി മലയോര കർഷകർ. എല്ലാ വർഷവും ഒരു ദിവസം മാത്രം മരം നട്ട് ഫോട്ടോ ഷൂട്ട് നടത്തുകയും വ്യാജ മരവാദം ഉയർത്തി മലയോര കർഷകനെ ദ്രോഹിക്കുകയും ചെയ്യുന്ന ലോക രാജ്യങ്ങളുടെ കാർബൺ ഫണ്ടിൽ നിന്നും വിഹിതം കൈപ്പറ്റുന്ന വ്യാജ പരിസ്ഥിതി സ്നേഹികൾക്കെതിരെ കിഫ (KIFA ) യുടെ നേതൃത്വത്തിൽ വേറിട്ട പ്രതിഷേധം.
സ്വന്തം കൃഷിഭൂമിയിലെ മരങ്ങൾ വെട്ടിവിൽക്കാൻ അവകാശമില്ലാത്തിടത്തോളം പുതിയ വൃക്ഷങ്ങൾ വെച്ചുപിടിപ്പിക്കുകയില്ല എന്നും നിലവിൽ ഉള്ള വൃക്ഷത്തൈകൾ പിഴുതെറിയും എന്നുമാണ് മലയോര കർഷകരുടെ നിലപാട്. വർഷം മുഴുവൻ വൃക്ഷങ്ങൾ നടുകയും വ്യാജ പരിസ്ഥിതി സ്നേഹികൾ പോകും പോലെ പോകാതെ അവയെ വർഷങ്ങളോളം പരിപാലിക്കുകയും ചെയ്യുന്ന കർഷകന് അവ പൂർണ വളർച്ചയെത്തുമ്പോൾ വെട്ടിവിൽക്കാനുള്ള അവകാശം നിഷേധിക്കുന്ന വ്യാജ പരിസ്ഥിതി സ്നേഹികളായ മരവാദികൾക്കെതിരെയാണ് കർഷകരുടെ പ്രതിഷേധം. നിലവിൽ 54% മരാവരണവും അതിവർഷവും ഉള്ള കേരളത്തിൽ ബുദ്ധിശൂന്യമായ മരം നടീൽ പ്രഹസനം നടത്തുന്നത് ലോക രാജ്യങ്ങളുടെ കാർബൺ ഫണ്ടിൽ നിന്നും വിഹിതം പറ്റാൻ വേണ്ടി മാത്രമാണ് എന്നാണ് കർഷകരുടെ നിലപാട്.
