രാജപാളയം : മലയാളിയായ പൂജാരി തമിഴ് യുവതിയെ കടത്തിക്കൊണ്ടു പോയതായി പരാതി. യുവതിയെ കണ്ടെത്താന് പോലീസ് നടപടി സ്വീകരിക്കണമെന്ന് യുവതിയുടെ ഭര്ത്താവ് രാജപാളയം മീനാക്ഷിപുരം സ്വദേശി മധുരപാണ്ഡ്യന് ആവശ്യപ്പെട്ടു. 12 വര്ഷമായി തുണിക്കച്ചവടം ചെയ്യുകയാണ് മധുരപാണ്ഡ്യന്. അഞ്ചു മാസം മുന്പാണു രാജപാളയം മീനാക്ഷിപുരം മാരിയമ്മന് കോവിലിലെ ചടങ്ങുകള്ക്കായി പൂജാരിയായി സമ്പത്ത് എന്ന പേരില് മലയാളി യുവാവ് എത്തിയത്.
മധുരപാണ്ഡ്യനേയും രണ്ടും ആറും വയസ്സുള്ള മക്കളേയും ഉപേക്ഷിച്ച് മധുരപാണ്ഡ്യന്റെ ഭാര്യ അര്ച്ചനാ ദേവി (27) പൂജാരിക്കൊപ്പം പോയി. വിരുദനഗര് ദളവാപുരം പോലീസ് സ്റ്റേഷനില് പരാതി നല്കിയതിന്റെ അടിസ്ഥാനത്തില് പോലീസ് യുവതിയെ കസ്റ്റഡിയിലെടുത്ത് ബന്ധുക്കളുടെ അടുത്ത് എത്തിച്ചെങ്കിലും അടുത്ത ദിവസം തന്നെ യുവതി പൂജാരിക്കൊപ്പം വീണ്ടും ഇറങ്ങിപ്പോയി. കഴിഞ്ഞ ജൂലൈയിലാണു സംഭവം. അത്തവണ 19 പവന് സ്വര്ണവുമായാണു യുവതി വീടുവിട്ടത്. കൊല്ലം കരുനാഗപ്പള്ളി സ്വദേശിയാണെന്നാണു സമ്പത്ത് അവിടെ പറഞ്ഞിട്ടുള്ളത്. പേരും സ്ഥലവുംമെല്ലാം വ്യാജമാണെന്നു മധുരപാണ്ഡ്യന് സംശയിക്കുന്നു.
ഇലന്തൂരിലെ ഇരട്ട നരബലി വാര്ത്തയറിഞ്ഞതോടെ ഭീതിയിലാണു മധുരപാണ്ഡ്യന്. കേരള പോലീസില് എസ്.ഐയായിരുന്നുവെന്നും ആ ജോലി ഉപേക്ഷിച്ചാണു പൂജാരിയായി ജോലി ചെയ്യുന്നതെന്നുമാണു സമ്പത്ത് അവിടെയുള്ളവരോട് പറഞ്ഞത്. കൂടാതെ 2 വീടുകളുണ്ടെന്നും പറഞ്ഞിരുന്നു. തെളിവിനായി പോലീസ് വാഹനത്തിനു മുന്പില് നില്ക്കുന്ന ചിത്രവും കാണിച്ചിരുന്നു. സ്വര്ണം അപഹരിച്ചശേഷം സമ്പത്ത് യുവതിയെ അപായപ്പെടുത്തിയിട്ടുണ്ടാകുമോയെന്ന ആശങ്കയിലാണു മധുരപാണ്ഡ്യന്റെ കുടുബം.
