പാലക്കാട് : അട്ടപ്പാടി ഊരുകളിലെ ഹോമിയോ മരുന്നുവിതരണം അനുമതിയില്ലാതെയെന്ന് അന്വേഷണ റിപ്പോര്ട്ട്. ഒറ്റപ്പാലം സബ് കളക്ടറുള്പ്പെടെ മൂന്ന് വകുപ്പുകള് നടത്തിയ അന്വേഷണത്തിലാണ് മരുന്നു വിതരണത്തിന് അനുമതിയില്ലെന്ന് വ്യക്തമായത്. അട്ടപ്പാടിയിലെ സന്നദ്ധ സംഘടനയായ എച്ച്.ആര്.ഡി.എസിന്റെ ഹോമിയോ മരുന്ന് വിതരണം സംബന്ധിച്ചുള്ള അന്വേഷണ റിപ്പോര്ട്ടുകള് ജില്ലാ കളക്ടര്ക്ക് കൈമാറി.
ഇതോടെ അനുമതിയോടെയാണ് അട്ടപ്പാടിയിലെ ആദിവാസി ഊരുകളില് ഹോമിയോ മരുന്ന് വിതരണം നടത്തിയതെന്ന എച്ച്.ആര്.ഡി.എസിന്റെ വാദം പൊളിയുകയാണ്. ഒറ്റപ്പാലം സബ് കലക്ടര്, ഐ.ടി.ഡി.പി പ്രൊജക്ട് ഓഫിസര്, ഹോമിയോ ഡി.എം.ഒ എന്നിവരുടെ റിപ്പോര്ട്ടില് മരുന്നുവിതരണത്തിന് ഒരു അനുമതിയും ഇല്ലെന്ന് വ്യക്തമായി.
അട്ടപ്പാടിയില് ഇത്തരം നടപടികള്ക്ക് മുന്കൂര് അനുമതി വേണമെന്ന ഒറ്റപ്പാലം സബ് കളക്ടറുടെ സര്ക്കുലര് ലംഘിച്ചാണ് മരുന്നുവിതരണമെന്ന് കണ്ടെത്തലുണ്ട്. എച്ച്ആര്ഡിഎസിന്റെ ചട്ടലംഘനവുമായി ബന്ധപ്പെട്ട തുടരന്വേഷണം പോലീസും ഹോമിയോ വകുപ്പും നടത്തുമെന്ന് ജില്ലാ കളക്ടര് മൃണ്മയി ജോഷി പറഞ്ഞു.