തിരുവല്ല: തിരുവല്ലയിലെ കാട്ടൂക്കരയില് ഗുണ്ടാ സംഘം വീടും വാഹനങ്ങളും അടിച്ചു തകര്ത്തു. കാട്ടുക്കര കൊച്ചുപുരയില് പ്രസാദിന്റെ വീടിന് നേരെയാണ് ആക്രമണം നടന്നത്. ഈസമയത്ത് പ്രസാദിന്റെ ഭാര്യ അജിത (51) മാത്രമാണ് വീട്ടിനുള്ളിലുണ്ടായിരുന്നത്. വീടിന്റെ എല്ലാ ജനല് ചില്ലകളും തകര്ത്ത നിലിയിലാണ്. ബഹളം കേട്ട് അലമുറയിട്ടെത്തിയ വീട്ടമ്മയുടെ മുഖത്ത് ജനാലയിലൂടെ കുരുമുളക് സ്പ്രേ അടിച്ച ശേഷമാണ് അക്രമണം അഴിച്ചു വിട്ടത്.
വീടിനുള്ളിലുണ്ടായിരുന്ന നാല് നായ്ക്കളെയും അക്രമികള് വെറുതെ വിട്ടില്ല. ഇവയുടെ കണ്ണിലും കുരുമുളക് സ്പ്രേ അടിച്ചു . വീടിന് സമീപം നിര്ത്തിയിട്ടിരുന്ന അജിതയുടെ ഇന്നോവ കാറിന്റെ എല്ലാ ചില്ലുകളും അക്രമികള് പൊട്ടിച്ചു. വടിവാളും കമ്പിവടികളുമായി എത്തിയ ഗുണ്ടകളെ കണ്ട് പേടിച്ച് സമീപവാസികളും വീടിനു പുറത്തിറങ്ങിയില്ല.
കാര്ഷെഡിനുള്ളില് സൂക്ഷിച്ചിരുന്ന രണ്ട് ബൈക്കുകളും ഒരു സ്കൂട്ടറും അക്രമികള് തകര്ത്തു. വീടിന്റെ പ്രധാന വാതിലും വടിവാള് ഉപയോഗിച്ച് തകര്ത്തെങ്കിലും പൂട്ട് തുറക്കാനായില്ല. എല്ലാ ജല വിതരണ കുഴലുകളും മുറിച്ചു മാറ്റി. അഞ്ചോളം പേരാണ് ഗുണ്ടാ സംഘത്തിലുണ്ടായിരുന്നതെന്ന് വീട്ടമ്മ പറഞ്ഞു. വീടിന്റെ ഉടമസ്ഥാവകാശം സംബന്ധിച്ച് തിരുവല്ല കോടതിയില് കേസും നിലവിലുണ്ട്. അജിത നല്കിയ പരാതിയില് തിരുവല്ല പോലീസ് കേസെടുത്തു.
