രാജകുമാരി: പൂപ്പാറയില് വീട്ടമ്മയെ ദുരൂഹ സാഹചര്യത്തില് മരിച്ച നിലയില് കണ്ടെത്തി. പടിഞ്ഞാറേക്കുടി പൗള്രാജിന്റെ ഭാര്യ മുരുകേശ്വരി(46)യെയാണ് മരിച്ച നിലയിൽ കണ്ടെത്തിയത്. ഇവരുടെ വീടിനു സമീപത്തെ ആള്ത്താമസമില്ലാത്ത മറ്റൊരു വീട്ടില് ആണ് മരിച്ച നിലയില് കണ്ടെത്തിയത്. വ്യാഴാഴ്ച ആരാധനാലയത്തില് പോയി മടങ്ങി വന്നതിനുശേഷം രാത്രിയില് ഇവരെ കാണാതാവുകയായിരുന്നു. ബന്ധുവീടുകളില് അന്വേഷിച്ചെങ്കിലും കണ്ടെത്താനായില്ല. തുടര്ന്ന് ബന്ധുക്കള് ശാന്തന്പാറ പോലീസില് പരാതി നല്കുകയായിരുന്നു.
ഇന്നലെ രാവിലെ എട്ടിന് ഇവരുടെ വീട്ടില്നിന്നു 100 മീറ്റര് അകലെ തുറന്നു കിടന്ന മറ്റൊരു വീട്ടില് മുരുകേശ്വരിയുടെ മൃതദേഹം കണ്ടെത്തുകയായിരുന്നു. സ്ഥലത്തിന്റെ ഉടമ രാവിലെ കൃഷിപ്പണികള്ക്കായി എത്തിയപ്പോഴാണ് മൃതദേഹം കണ്ടത്. ശാന്തന്പാറ പോലീസ് സ്ഥലത്തെത്തി മേല്നടപടികള് സ്വീകരിച്ചു. പോസ്റ്റ്മോർട്ടത്തിനായി മൃതദേഹം ഇടുക്കി മെഡിക്കല് കോളജിലേക്കു മാറ്റി. മരണത്തില് ദുരൂഹത ആരോപിച്ച് മുരുകേശ്വരിയുടെ ബന്ധുക്കള് രംഗത്തെത്തി. എന്നാല്, അസ്വാഭാവിക മരണത്തിന്റെ ലക്ഷണങ്ങള് പ്രാഥമിക പരിശോധനയില് കണ്ടെത്താന് കഴിഞ്ഞില്ലെന്നും പോസ്റ്റുമോര്ട്ടത്തിനുശേഷം മാത്രമേ മരണകാരണം വ്യക്തമാകൂ എന്നും ശാന്തന്പാറ സിഐ അറിയിച്ചു.
