കോഴിക്കോട് : അത്തോളി കണ്ണംപോയിലിലെ എസ്ആർ ഓയിൽ മില്ലിൽ ഇന്നലെ രാത്രിയോടെയുണ്ടായ വൻ തീപിടിത്തത്തിൽ മിൽ പൂർണ്ണമായും കത്തിനശിച്ചു. നാല് മണിക്കൂർ നീണ്ട കഠിനപ്രയത്നത്തിനൊടുവിലാണ് ഫയർഫോഴ്സിന് തീ പൂർണ്ണമായും അണയ്ക്കാനായത്. മില്ലിലുണ്ടായിരുന്ന 2000 ലിറ്റർ വെളിച്ചെണ്ണ, കൊപ്ര, തേങ്ങ തുടങ്ങിയവയെല്ലാം പൂർണ്ണമായും കത്തി നശിച്ചു. ഓയിൽ മിൽ ഇപ്പോൾ പൂർണ്ണമായും ഉപയോഗശൂന്യമായ നിലയിലാണ്.
അഞ്ച് യൂണിറ്റുകളിൽ നിന്നായി 20 പേരടങ്ങുന്ന ഫയർഫോഴ്സ് സംഘമാണ് രക്ഷാപ്രവർത്തനത്തിന് നേതൃത്വം നൽകിയത്. ഏറെ പണിപ്പെട്ടാണ് തീ നിയന്ത്രണവിധേയമാക്കിയത്. തീപിടിത്തത്തിന്റെ കൃത്യമായ കാരണം ഇതുവരെ ലഭ്യമായിട്ടില്ല. ഷോർട്ട് സർക്യൂട്ട് ആണോ അതോ മറ്റ് കാരണങ്ങളാണോ എന്നതിനെക്കുറിച്ച് പോലീസും ഫയർഫോഴ്സും അന്വേഷണം നടത്തിവരികയാണ്. തീപിടിത്തത്തിൽ ലക്ഷക്കണക്കിന് രൂപയുടെ നാശനഷ്ടങ്ങൾ സംഭവിച്ചതായാണ് പ്രാഥമിക വിവരം.
