കൊച്ചി: മനുഷ്യക്കടത്ത് മജീദിന്റെ ലുക്ക്ഔട്ട് നോട്ടീസ് പുറപ്പെടുവിക്കാനൊരുങ്ങി പോലീസ്. കുവൈത്ത് മനുഷ്യക്കടത്ത് കേസില്‍ അറസ്റ്റിലായ പത്തനംതിട്ട സ്വദേശി അജുമോന്റെ കേസിലെ പങ്ക് അറിയാന്‍ വിശദമായി ചോദ്യം ചെയ്യുമെന്ന് പോലീസ്. അറസ്റ്റിലാകാനുള്ള മറ്റൊരു പ്രതി കണ്ണൂര്‍ സ്വദേശി മജീദിന്റെ നിര്‍ദേശ പ്രകാരം പരസ്യം നല്‍കി കുവൈത്തില്‍ ജോലിക്ക് താല്‍പര്യമുള്ളവരെ കണ്ടെത്തുക മാത്രമാണ് താന്‍ ചെയ്തിട്ടുള്ളൂവെന്നും വേറെയൊന്നും അറിയില്ലെന്നുമാണ് അജുമോന്റെ മൊഴി.
മജീദിന്റെ മേല്‍വിലാസം ഇതുവരെ കണ്ടെത്താന്‍ പോലീസിന് സാധിച്ചിട്ടില്ല. ഇയാളുടെ പാസ്‌പോര്‍ട്ട് റദ്ദാക്കി ലുക്കൗട്ട് നോട്ടീസ് പുറപ്പെടുവിക്കാനാണ് നീക്കം. തോപ്പുംപടി സ്വദേശിനിയെ കഴിഞ്ഞ ഫെബ്രുവരിയില്‍ കുവൈത്തില്‍ എത്തിച്ച അജുമോനും മജീദും പറഞ്ഞ ജോലി നല്‍കാതെ യുവതിയെ മാനസികമായി പീഡിപ്പിച്ചതായാണ്‌ പരാതി. തോപ്പുംപടി സ്വദേശിനിക്കൊപ്പം രണ്ട്‌ മലയാളി യുവതികളെയും കയറ്റി അയച്ചിരുന്നു. അറബികളുടെ വീട്ടില്‍ ജോലിക്കാണ്‌ തോപ്പുംപടി സ്വദേശിനിയെ നിയോഗിച്ചത്‌.
വിശ്രമം നല്‍കാതെ ജോലിയെടുപ്പിച്ചതിനെ തുടര്‍ന്ന്‌ യുവതി പരാതിപ്പെട്ടിരുന്നു. എന്നാല്‍ നാട്ടിലേക്ക് തിരിച്ചയക്കാന്‍ മൂന്ന്‌ ലക്ഷം രൂപ അജുമോനും മജീദും ആവശ്യപ്പെട്ടെന്നും പരാതിയില്‍ പറയുന്നു. സന്നദ്ധ സംഘടനകളുടെ സഹായത്തോടെ രക്ഷപ്പെട്ട്‌ എത്തിയ തോപ്പുംപടി സ്വദേശിനിയുടെ പരാതിയില്‍ എറണാകുളം സൗത്ത് പോലീസ് കേസ്‌ രജിസ്‌റ്റര്‍ ചെയ്യുകയായിരുന്നു. മറ്റൊരു വീട്ടമ്മകൂടി ആരോപണവുമായി രംഗത്ത് വന്നെങ്കിലും സിറ്റി പോലീസിന് പരാതി ലഭിച്ചിട്ടില്ല.
