ഹൈദരാബാദ് : പ്രായപൂര്ത്തിയാകാത്ത പെണ്കുട്ടിയെ കാറിനുള്ളില് കൂട്ടബലാത്സംഗത്തിന് ഇരയാക്കിയ സംഭവത്തില് എഐഎംഐഎം എംഎല്എയുടെ മകന് അടക്കമുള്ളവര് അറസ്റ്റിലായി. ഇതോടെ കേസില് ഉള്പ്പെട്ട ആറുപേരും പിടിയിലായതായി പോലീസ് പറഞ്ഞു. കഴിഞ്ഞ ദിവസം രണ്ടു പേരെ പോലീസ് അറസ്റ്റ് ചെയ്തിരുന്നു. പിടിയിലായവരില് അഞ്ചുപേര് പ്രായപൂര്ത്തി ആകാത്തവരാണ്. സദുദീന് മാലിക്ക് (18) ആണ് അറസ്റ്റിലായ പ്രായപൂര്ത്തിയായ ആള്.
പ്രായപൂര്ത്തി ആകാത്തവരില് ഒരാള് എഐഎംഐഎം എംഎല്എയുടെ മകനും മറ്റൊരാള് എംഎല്എയുടെ ബന്ധുവുമാണെന്നാണ് പുറത്തുവരുന്ന വിവരം. അറസ്റ്റിലായ അഞ്ചു പേര്ക്കുമെതിരെ കൂട്ടബലാത്സംഗത്തിനും എംഎല്എയുടെ മകനെതിരെ പ്രായപൂര്ത്തി ആകാത്തവര്ക്കെതിരായ ലൈംഗിക പീഡനത്തിനുമാണ് കേസെടുത്തിട്ടുള്ളത്. മേയ് 28-ാം തീയതിയാണ് പബ്ബില്നിന്ന് പാര്ട്ടി കഴിഞ്ഞ് മടങ്ങിയ 17-കാരിയെ പ്രതികള് കാറിലിട്ട് കൂട്ടബലാത്സംഗം ചെയ്തത്. പബ്ബില്നിന്ന് പരിചയപ്പെട്ട പെണ്കുട്ടിയെ വീട്ടില് വിടാമെന്ന് പറഞ്ഞ് ആഡംബര കാറില് കയറ്റിക്കൊണ്ടുപോവുകയും ബലാത്സംഗം ചെയ്യുകയുമായിരുന്നു.
