വിഴിഞ്ഞം : കാലാവസ്ഥവ്യതിയാനം മൂലമുള്ള ദുരന്തങ്ങള് ഫലപ്രദമായി പ്രതിരോധിക്കുന്നതിന് ഹൈഡ്രോഗ്രാഫിക് സര്വേ വിഭാഗം പൂര്ണമായി ഡിജിറ്റലാക്കുമെന്ന് തുറമുഖ വകുപ്പ് മന്ത്രി അഹമ്മദ് ദേവര്കോവില്. വിഴിഞ്ഞത്ത് പ്രവര്ത്തനമാരംഭിച്ച ഹൈഡ്രോഗ്രാഫിക് മറൈന് സര്വേയര് ഓഫിസ് ഉദ്ഘാടനം ചെയ്യുകയായിരുന്നു മന്ത്രി. കടല്തീരത്തിന്റെയും മറ്റ് ജലസ്രോതസ്സുകളുടെയും ഡിജിറ്റല് രൂപരേഖ തയാറാക്കിവരുകയാണ്. യുവാക്കള്ക്ക് തൊഴില് പരിശീലനം നല്കുന്നതിനായി പൊന്നാനിയില് ഹൈഡ്രോഗ്രാഫിക് സര്വേ ഇന്സ്റ്റിറ്റ്യൂട്ടിന്റെ ഉപകേന്ദ്രം ഉടന് ആരംഭിക്കും. അന്താരാഷ്ട്ര തുറമുഖ സാധ്യതകള് പരമാവധി ഉപയോഗപ്പെടുത്തുന്നതിനാണ് ഇവിടെ ഉപകേന്ദ്രം ആരംഭിക്കുന്നതെന്നും മന്ത്രി പറഞ്ഞു.
എം.വിന്സെന്റ് എം.എല്.എ അധ്യക്ഷത വഹിച്ചു. വിഴിഞ്ഞം കോസ്റ്റ് ഗാര്ഡ് സ്റ്റേഷന് കമാന്ഡന്റ് ജി.ശ്രീകുമാര്, ഹാര്ബര് എന്ജിനീയറിങ് എക്സിക്യൂട്ടിവ് എന്ജിനീയര് അനില്കുമാര്, വിഴിഞ്ഞം പോര്ട്ട് ഓഫിസര് സെജോ ഗോര്ബിയസ്, വെങ്ങാനൂര് ഗ്രാമപഞ്ചായത്ത് പ്രസിഡന്റ് ആര്.എസ് ശ്രീകുമാര്, ചീഫ് ഹൈഡ്രോഗ്രാഫര് വി.ജിരോഷ് കുമാര്, ഗ്രാമപഞ്ചായത്തംഗം സുഗന്ധി മോഹന് എന്നിവര് സംസാരിച്ചു.
