ഹ്യുണ്ടേയ് കമ്പനിക്ക് വാഹനങ്ങളുടെ ഭാഗങ്ങള് വിതരണം ചെയ്യുന്ന ഉപകമ്പനിയാണ് ഹ്യുണ്ടെയ് മൊബിസ്. ട്രാഫിക് സിഗ്നലുകള്ക്കൊപ്പം കാല്നട യാത്രികരെക്കുറിച്ചുള്ള മുന്നറിയിപ്പ് നല്കാനും ശേഷിയുള്ള ഹെഡ്ലൈറ്റ് ഒരുക്കുകയാണ് ഹ്യുണ്ടായി. രാത്രിയാത്രകളുടെ സുരക്ഷ വര്ധിപ്പിക്കുന്നതാണ് തങ്ങളുടെ പുതിയ ഉത്പന്നമെന്ന് ഹ്യുണ്ടേയ് മൊബിസ് വാര്ത്താക്കുറിപ്പില് അവകാശപ്പെടുന്നു. വാഹനത്തിന്റെ ജിപിഎസുമായും ഓണ്ബോര്ഡ് ക്യാമറയുമായും ബന്ധിപ്പിക്കുന്ന ലൈറ്റിങ് സംവിധാനമാണിത്. ഇതുവഴിയാണ് റോഡ് സിഗ്നലുകളെക്കുറിച്ചും കാല്നടയാത്രക്കാരെക്കുറിച്ചുമൊക്കെയുള്ള വിവരങ്ങള് തല്സമയം ലൈറ്റിങ് സംവിധാനത്തിന് ലഭിക്കുക. ഉദാഹരണത്തിന് മുന്നിലെ പാതയില് എവിടെയെങ്കിലും അറ്റകുറ്റപ്പണി നടക്കുന്നുണ്ടെങ്കില് അത് മുന്നറിയിപ്പായി ഹെഡ്ലൈറ്റിലൂടെ ഡ്രൈവര്ക്ക് മുന്നിലെ റോഡില് തെളിയും.
നിരവധി ചെറു എല്.ഇ.ഡികളുടേയും ചെറു കണ്ണാടികളുടേയും സഹായത്തിലാണ് ഇങ്ങനെയൊരു ലൈറ്റിംങ് സംവിധാനം പ്രവര്ത്തിക്കുന്നത്. 25,000 എല്.ഇ.ഡികളാണ് ഓരോ ഹെഡ്ലൈറ്റിലും ഉണ്ടാവുക. സാമ്പ്രദായിക എല്.ഇ.ഡി ലൈറ്റുകളുടെ 250 ഇരട്ടിയാണിതെന്നും ഹ്യുണ്ടേയ് മൊബിസ് പറയുന്നു. മനുഷ്യന്റെ മുടിയേക്കാള് കുറഞ്ഞ കനമുള്ള(0.04 എംഎം) എല്.ഇ.ഡികളാണ് ഇതിലുണ്ടാവുക. 0.01 എംഎം മാത്രമാണ് കണ്ണാടികളുടെ വീതി. ഇത്രയും ചെറിയ എല്.ഇ.ഡികളും കണ്ണാടികളും വ്യത്യസ്ത രൂപങ്ങള് റോഡില് പ്രതിഫലിപ്പിക്കുന്നതിന് സഹായിക്കും.
സമാനമായ ആശയം മേബാക്ക് എസ് ക്ലാസിനു വേണ്ടി മെഴ്സിഡീസ് ബെന്സ് 2018ല് അവതരിപ്പിച്ചിരുന്നു. 2022ല് ഫോഡിന്റെ യൂറോപ്പിലെ എൻജിനീയര്മാരും ഡ്രൈവര്മാര്ക്ക് വ്യത്യസ്ത രൂപങ്ങള് മുന്നില് കാണിച്ചു തരുന്ന ഹെഡ്ലൈറ്റുകള് അവതരിപ്പിച്ചിരുന്നു. അതേസമയം തങ്ങളുടെ ഉത്പന്നം ഏതെങ്കിലും വാഹനത്തില് ഹ്യുണ്ടേയ് ഉള്പ്പെടുത്തുമോ എന്ന കാര്യത്തില് ഹ്യുണ്ടേയ് മൊബിസിന് ഇതുവരെ ഉറപ്പു ലഭിച്ചിട്ടില്ല.
