തിരുവനന്തപുരം : ഐ ഫോണ് ആരോപണം യൂണിടാക് എം.ഡി സന്തോഷ് ഈപ്പനെക്കൊണ്ട് പറയിപ്പിച്ചത് സിപിഎം ആണെന്നു പ്രതിപക്ഷ നേതാവ് രമേശ് ചെന്നിത്തല. സിബിഐ അന്വേഷണത്തില് നിന്ന് രക്ഷപെടാനാണ് ഐ ഫോണ് വിവാദത്തിലൂടെ സന്തോഷിന്റെ ശ്രമം. സിപിഎമ്മിനെ പ്രീതിപ്പെടുത്തുന്നതിനാണ് ഇങ്ങനെ ഒരു അപവാദം വിളിച്ചു പറഞ്ഞത്. ഒരു കോടി രൂപ നഷ്ടപരിഹാരം ആവശ്യപ്പെട്ട് സന്തോഷ് ഈപ്പന് നോട്ടീസ് അയച്ചെന്നും ചെന്നിത്തല.
ചെന്നിത്തലയ്ക്കുള്പ്പെടെ അഞ്ച് ഐ ഫോണ് വാങ്ങി സ്വപ്നാ സുരേഷിനു കൈമാറിയെന്ന സന്തോഷ് ഈപ്പന്റെ മൊഴി സിപിഎം ഏറ്റുപിടിച്ചിരുന്നു. ഇതിനു മറുപടിയായി ഐ ഫോണ് ലഭിച്ചത് കോടിയേരിയുടെ മുന്സ്റ്റാഫും അസിസ്റ്റന്റ് പ്രോട്ടോക്കോള് ഓഫീസറുമായ എ.പി.രാജീവനാണെന്നും കഴിഞ്ഞദിവസം ചെന്നിത്തല വിശദീകരിച്ചിരുന്നു. പിന്നാലെയാണ് ചെന്നിത്തല നിയമനടപടിക്ക് ഒരുങ്ങിയത്. ഇതിന്റെ ഭാഗമായാണ് സന്തോഷ് ഈപ്പനു ആദ്യം വക്കീല് നോട്ടീസ് അയച്ചത്. കേസ് റജിസ്റ്റര് ചെയ്തു അന്വേഷിച്ച് ഫോണ് ഉപയോഗിക്കുന്നവരെ കണ്ടെത്തണമെന്നാവശ്യപ്പെട്ട് ഹൈക്കോടതിയെ സമീപിക്കാനുമാണ് നീക്കം.
സന്തോഷ് കോടതിയില് സമര്പ്പിച്ച ഫോണ് രേഖകളിലെ ഐ.എം.ഇ നമ്പര് ഉപയോഗിച്ച് അന്വേഷിക്കണമെന്നാവശ്യപ്പെട്ട് ഡി.ജി.പിയെ സമീപിച്ചെങ്കിലും കേസെടുത്ത് മാത്രമേ അന്വേഷിക്കാന് കഴിയുകയുള്ളുവെന്ന നിലപാടിലാണ് പോലീസ്. വിശദാംശങ്ങള് വെളിപ്പെടുത്തുന്നത് സ്വകാര്യതയെ ബാധിക്കുമെന്നും ചൂണ്ടികാട്ടിയിരുന്നു. അതേസമയം വിവാദത്തില് വിശദമായ അന്വേഷണം നടത്തണമെന്നു യു.ഡി.എഫ്.കണ്വീനര് എം.എം.ഹസന് ആവശ്യപ്പെട്ടു. അന്വേഷണവശ്യമുന്നയിച്ച് പ്രതിപക്ഷ നേതാവ് തന്നെ കോടതിയില് പോയതോടെ സംഭവം മറ്റൊരു രീതിയിലേക്ക് തിരിയും.
