കോന്നി : തണ്ണിത്തോട് ഗ്രാമ പഞ്ചായത്തിന്റെ വിവിധ ഇടങ്ങളിൽ അനധികൃത പച്ചമണ്ണ് കടത്ത് വ്യാപകം. കഴിഞ്ഞ ദിവസമാണ് തണ്ണിത്തോട് മൂഴി എ കെ ജി ജംഗ്ഷന് സമീപത്തെ കെട്ടിടത്തിന് മുൻപിൽ നിന്നും പച്ചമണ്ണ് ജെ സി ബി ഉപയോഗിച്ച് നീക്കം ചെയ്ത ശേഷം പിക്കപ്പിൽ കടത്തിയത്. ആദ്യത്തെ ലോഡ് കയറ്റി വിട്ട ശേഷം അതുവഴി വന്ന യാത്രക്കാരൻ മൊബൈലിൽ ചിത്രങ്ങൾ പകർത്തുന്നത് കണ്ട് മണ്ണ് നീക്കം ചെയ്തവൻ സ്ഥലം വിടുകയും ചെയ്തു.
പ്രദേശത്തെ പ്രാദേശിക സി പി ഐ എം നേതാവിന്റെ പിക് അപ്പ് വാനാണ് മണ്ണ് നീക്കം ചെയ്യുവാൻ ഉപയോഗിച്ചത്. എന്നാൽ ഇത് നീക്കം ചെയ്യുവാൻ വില്ലേജ് ഓഫീസ് അധികൃതരോ മറ്റ് ബന്ധപ്പെട്ട വകുപ്പുകളോ അനുമതി നൽകിയിട്ടുമില്ല. ജെ സി ബി ഉപയോഗിച്ച് മണ്ണ് നീക്കം ചെയ്യുമ്പോൾ ബി എം ആൻഡ് ബി സി സാങ്കേതിക വിദ്യയിൽ നിർമ്മിച്ച റോഡ് ജെ സി ബി യുടെ സ്റ്റേബിലൈസർ ഇടിച്ച് തകരുന്നതിനും ഇടയാകും. തണ്ണിത്തോട് പോലീസ് അധികൃതരും വിഷയത്തിൽ നടപടി സ്വീകരിച്ചിട്ടില്ല. മുൻപ് തണ്ണിത്തോട് പഞ്ചായത്തിന്റെ വിവിധ ഇടങ്ങളിൽ പച്ചമണ്ണ് കടത്തും പാറ കടത്തും വ്യാപകമായിരുന്നു.
