ന്യൂഡല്‍ഹി : യോഗഗുരു ബാബ രാംദേവിന് ഇന്ത്യന്‍ മെഡിക്കല്‍ അസോസിയേഷന്‍ (ഐ.എം.എ) ഉത്തരാഖണ്ഡ് യൂണിറ്റ് മാനനഷ്ട നോട്ടീസ് അയച്ചു. അലോപ്പതി ചികിത്സയ്‌ക്കെതിരേയും ഡോക്ടര്‍മാര്‍ക്കെതിരേയും രാംദേവ് വിവാദപരാമാര്‍ശം നടത്തിയതിനെ തുടര്‍ന്നാണിത്. 15 ദിവസത്തിനുള്ളില്‍ വിവാദപരാമര്‍ശം രേഖാമൂലം പിന്‍വലിച്ച്‌ മാപ്പ് പറഞ്ഞില്ലെങ്കില്‍ 1000കോടി രൂപയുടെ മാനനഷ്ടക്കേസ് ഫയല്‍ ചെയ്യുമെന്നാണ് മുന്നറിയിപ്പ്.
വ്യാപക വിമര്‍ശനം ഉണ്ടായതിന്റെ അടിസ്ഥാനത്തില്‍ കേന്ദ്ര ആരോഗ്യമന്ത്രി ഹര്‍ഷവര്‍ദ്ധന്‍ പരാമര്‍ശം പിന്‍വലിയ്ക്കാന്‍ രാംദേവിനോടാവശ്യപ്പെട്ടിരുന്നു. ഇതിന് പിന്നാലെ ചില പരാമര്‍ശങ്ങള്‍ പിന്‍വലിക്കുന്നുവെന്ന് രാംദേവ് ട്വീറ്റ് ചെയ്‌തെങ്കിലും ഖേദം പ്രകടിപ്പിക്കാന്‍ തയ്യാറായിരുന്നില്ല. രാംദേവിനെതിരെ നടപടിക്കായി ഐ.എം.എ ഉത്തരാഖണ്ഡ് മുഖ്യമന്ത്രിയ്ക്കും ചീഫ് സെക്രട്ടറിയ്ക്കും പരാതി നല്കിയിരുന്നു. അലോപ്പതി മരുന്നുകള്‍ കാരണം ലക്ഷക്കണക്കിന് ആളുകള്‍ മരിച്ചുവെന്നും ചികിത്സയോ ഓക്‌സിജനോ ലഭിക്കാതെ മരിച്ചവരേക്കാള്‍ വളരെ കൂടുതലാണതെന്നും അടുത്തിടെ നടന്ന പരിപാടിയില്‍ രാംദേവ് പറഞ്ഞതാണ് വിവാദങ്ങള്‍ക്കിടയാക്കിയത്.
