2026 സിനിമ പ്രേമികൾക്ക് ആവേശം നിറഞ്ഞതാകുമെന്നാണ് ഐഎംഡിബി പുറത്തുവിട്ട സിനിമകളുടെ പട്ടിക വ്യക്തമാക്കുന്നത്. വൻ താരനിരയോടെയും വലിയ ബഡ്ജറ്റുകളോടെയും ഒരുങ്ങുന്ന പാൻ ഇന്ത്യൻ സിനിമകളാണ് ആദ്യ 20 സ്ഥാനങ്ങളിലുമുള്ളത്. എന്നാൽ പട്ടിക മലയാളി പ്രേക്ഷകരെ നിരാശപ്പെടുത്തുന്നതാണ്. ആദ്യ 20 സ്ഥാനങ്ങളിൽ ഒരു മലയാളം സിനിമ മാത്രമാണ് ഇടം നേടിയിരിക്കുന്നത്. ഷാരൂഖ് ഖാൻ നായകനായി സിദ്ധാർഥ് ആനന്ദ് സംവിധാനം ചെയ്യുന്ന ‘കിംഗ്’ ആണ് ഒന്നാം സ്ഥാനത്ത്. ദീപിക പദുകോൺ, സുഹാന ഖാൻ, അഭിഷേക് ബച്ചൻ എന്നിവരുടെ സാന്നിധ്യവും വൻ ആക്ഷൻ പശ്ചാത്തലവും സിനിമയോടുള്ള പ്രതീക്ഷ വർധിപ്പിക്കുന്നു.
രണ്ടാം സ്ഥാനത്ത് നിതീഷ് തിവാരി ഒരുക്കുന്ന ‘രാമായണ’യാണ്. രൺബീർ കപൂർ, സായ് പല്ലവി, യഷ് എന്നിവരെ കേന്ദ്രകഥാപാത്രങ്ങളാക്കി രണ്ട് ഭാഗങ്ങളിലായി ചിത്രം പുറത്തിറങ്ങും. വിജയ് നായകനായ ‘ജനനായകൻ’ മൂന്നാം സ്ഥാനവും, പ്രഭാസ്–സന്ദീപ് റെഡ്ഡി വാങ്ക ചിത്രം ‘സ്പിരിറ്റ്’ നാലാം സ്ഥാനവും നേടി. യഷ് നായകനായ ‘ടോക്സിക്’, സൽമാൻ ഖാന്റെ ‘ബാറ്റിൽ ഓഫ് ഗാൽവൻ’ തുടങ്ങിയവയും പട്ടികയിൽ മുൻപന്തിയിലുണ്ട്. ആദ്യ പത്തിൽ ഒരു മലയാളം സിനിമയ്ക്കും ഇടം ലഭിച്ചില്ല എന്നതാണ് ശ്രദ്ധേയം. മോഹൻലാൽ – ജീത്തു ജോസഫ് കൂട്ടുകെട്ടിലെ ‘ദൃശ്യം 3’ ഉൾപ്പെടെ മലയാളികൾ പ്രതീക്ഷയോടെ കാത്തിരിക്കുന്ന നിരവധി സിനിമകൾ പട്ടികയിൽ ഇടം നേടാതിരുന്നതും ആരാധകരിൽ ചർച്ചയാകുകയാണ്.
