കോഴിക്കോട് : പി.എം. താജ് റോഡിലെ യൂണിയന് ബാങ്ക് ശാഖയില് സ്വര്ണമെന്ന വ്യാജേന അഞ്ചരക്കിലോ മുക്കുപണ്ടം പണയംവെച്ച് 1.69 കോടി തട്ടിയ കേസിലെ പ്രതി മണിചെയിന് മാതൃകയിലുള്ള മള്ട്ടിലെവല് മാര്ക്കറ്റിങ്ങിന്റെ (എം.എല്.എം) കണ്ണിയെന്ന് പോലീസ്. ഒന്നാംപ്രതി വയനാട് മണവയല് അങ്ങാടിശ്ശേരി പുതിയേടത്ത് വീട്ടില് കെ.കെ. ബിന്ദുവിനാണ് എം.എല്.എം ഇടപാടുള്ളത്. മൂന്നുദിവസത്തെ പോലീസ് കസ്റ്റഡിയില് കിട്ടിയ പ്രതിയെ വിശദമായി ചോദ്യംചെയ്തപ്പോഴാണ് ഈ വിവരങ്ങള് പുറത്തു വന്നത്.
വലിയ സാമ്പത്തിക നേട്ടം ലക്ഷ്യമിട്ട് ഇവര് നിരവധിപേരെ കണ്ണിയില് ചേര്ത്തതായും ഇതിനടക്കമുള്ള തുക കണ്ടെത്താനാണ് തട്ടിപ്പ് നടത്തിയതെന്നുമാണ് വിവരം. പ്രതി 90 ലക്ഷത്തോളം രൂപക്ക് മുക്കുപണ്ടം വാങ്ങിയ തൃശൂര് പൂങ്കുന്നത്തെ ആഭരണ നിര്മാണ ശാലയില് കഴിഞ്ഞദിവസം പോലീസ് തെളിവെടുപ്പ് നടത്തി.