തിരുവല്ല : സ്കൂള്‍ വിദ്യാര്‍ഥിനികള്‍ക്ക് നേരെ നേരെ നഗ്നതാ പ്രദർശനം നടത്തുകയും അശ്ലീല പരാമർശങ്ങൾ നടത്തുകയും ചെയ്ത സംഭവത്തില്‍ യുവാവിനെ കോയിപ്പുറം പോലീസ് അറസ്റ്റ് ചെയ്തു. കോയിപ്രം പുല്ലാട് തെറ്റുപാറ കോളനിയില്‍ താമസിക്കുന്ന വിഷ്ണു ഭവനം വീട്ടില്‍ പി.കെ.ശശിയുടെ മകന്‍ വിഷ്ണു കെ.എസ്. ( 32)നെ ആണ് കോയിപ്പുറം പോലീസ് അറസ്റ്റ് ചെയ്തത്. വെള്ളിയാഴ്ച രാവിലെ സ്കൂളിലേക്ക് പോവുകയായിരുന്ന പെൺകുട്ടികളെ ഇയാൾ ബൈക്കിലെത്തി അശ്ലീല പദപ്രയോഗങ്ങൾ നടത്തുകയും നഗ്നതാ പ്രദര്‍ശനം നടത്തുകയുമായിരുന്നു.
രക്ഷകർത്താക്കളോടൊപ്പം സ്റ്റേഷനിൽ എത്തിയ കുട്ടിയുടെ മൊഴി രേഖപ്പെടുത്തി കേസ് രജിസ്റ്റർ ചെയ്ത കോയിപ്പുറം പോലീസ് പ്രതിയെ പിടികൂടുകയായിരുന്നു. കീഴ്വായ്പൂർ സർക്കിൾ ഇൻസ്പെക്ടർ സുരേഷ്‌കുമാർ, എസ്.ഐ.അനൂബ് പി., ഉദ്യോഗസ്ഥരായ അഭിലാഷ്, സുരേഷ്, വിപിൻരാജ്, മനൂപ്, രശ്മി എന്നിവരടങ്ങിയ പോലീസ് സംഘമാണ് പ്രതിയെ പിടികൂടിയത്. പത്തനംതിട്ട ജുഡീഷ്യൽ ഒന്നാംക്ലാസ് മജിസ്ട്രേറ്റ് കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
