ശ്രീനഗര്‍ : ലഡാക്ക് അതിര്‍ത്തിയില്‍ ചൈനയ്ക്കെതിരെ നിര്‍ണായക നീക്കവുമായി ഇന്ത്യ. സെല്‍ഫ് പ്രൊപ്പെല്‍ഡ് പീരങ്കികളോട് കൂടിയ കെ.9 വജ്ര ടാങ്കുകള്‍ വിന്യസിക്കും. ഇതിനായുള്ള നടപടികള്‍ ആരംഭിച്ചതായി കേന്ദ്ര പ്രതിരോധ മന്ത്രാലയം അറിയിച്ചു.
അതിര്‍ത്തിയില്‍ സംഘര്‍ഷത്തിനുള്ള സാദ്ധ്യത ഇനിയും തള്ളിക്കളയാന്‍ ആകാത്ത സാഹചര്യത്തില്‍ കഴിഞ്ഞ ഫെബ്രുവരി മുതല്‍ ടാങ്കുകള്‍ ഉപയോഗിച്ചുള്ള പരിശീലനം ആരംഭിച്ചിരുന്നു. ഇത് ഏകദേശം അവസാനിക്കാനിരിക്കെയാണ് ടാങ്കുകള്‍ വിന്യസിക്കാനുള്ള നടപടികള്‍ അധികൃതര്‍ വേഗത്തിലാക്കിയത്. അടുത്തിടെ ലഡാക്ക് അതിര്‍ത്തിയില്‍ ചൈനീസ് സൈന്യത്തിന്റെ സംശയാസ്പദ നീക്കങ്ങള്‍ സൈന്യത്തിന്റെ ശ്രദ്ധയില്‍പ്പെട്ടിട്ടുണ്ട്. ഇതാണ് നീക്കങ്ങള്‍ വേഗത്തിലാക്കാന്‍ കാരണമെന്നാണ് നിഗമനം.
ലഡാക്കിലെ സമതലങ്ങളില്‍ അതീവ കാര്യക്ഷമതയോടെ പ്രവര്‍ത്തിപ്പിക്കാന്‍ കഴിയുന്ന ടാങ്കുകളാണ് കെ.9 വജ്ര ടാങ്കുകള്‍. ആദ്യമായാണ് വജ്ര ടാങ്കുകള്‍ ലഡാക്കില്‍ വിന്യസിക്കുന്നത്. 2018 ലാണ് ടാങ്കുകള്‍ കരസേനയ്ക്ക് ഔദ്യോഗികമായി കൈമാറിയത്. മണിക്കൂറില്‍ 67 കിലോ മീറ്റര്‍ വരെ വേഗത്തില്‍ സഞ്ചരിക്കാന്‍ കഴിയുന്ന ടാങ്കുകള്‍ക്ക് 18 മുതല്‍ 52 കിലോ മീറ്റര്‍വരെയുള്ള ലക്ഷ്യം ഭേദിക്കാന്‍ സാധിക്കും. അഞ്ച് പേരടങ്ങുന്ന സൈനിക സംഘത്തിന് ടാങ്കില്‍ സഞ്ചരിക്കാം.
