അയിരൂർ : ഭാരതം ഭാവിയിൽ ലോകത്തെ ഒന്നാം സൈനിക ശക്തിയാകുമെന്ന് റിട്ട. മേജർ ജനറൽ ഡി.പി.വിവേകാനന്ദൻ. ചെറുകോൽപ്പുഴ ഹിന്ദുമത പരിഷത്തിലെ പൂർവ സൈനിക സഭ ഉദ്ഘാടനം ചെയ്യുകയായിരുന്നു അദ്ദേഹം. ഏത് രാഷ്ട്രത്തിന്റെയും ഈട് അതിന്റെ സൈനികരാണ്. സാങ്കേതികതയിലും ആൾബലത്തിലും ഭാരത സൈനികർ മറ്റുള്ളവരെക്കാൾ മുന്നേറുകയാണ്.
വൈദേശിക ആക്രമണം ഉണ്ടായിട്ടും ഇന്നും ഹൈന്ദവസംസ്കാരം നിലനിൽക്കുന്നത് ഒാരോകാലത്തും നടത്തിയ സൈനികമായ പ്രതിരോധങ്ങളുടെ ഫലമാണ്. ഒരുരാജ്യത്തെ താങ്ങിനിർത്തുന്നത് ആ രാജ്യത്തിന്റെ ഭൂമിശാസ്ത്രം, സമ്പത്ത്, ഭരണകൂടം, സൈന്യം എന്നീ ഘടകങ്ങളാണെന്നും അദ്ദേഹം പറഞ്ഞു. റിട്ട. കേണൽ എസ്.ഡിന്നി അധ്യക്ഷത വഹിച്ചു. സ്വാമിനി ദേവി ജ്ഞാനാഭനിഷ്ഠ അനുഗ്രഹപ്രഭാഷണം നടത്തി. രാഷ്ട്രം മഹാവീരചക്രം നൽകി ആദരിച്ച പരേതനായ ക്യാപ്റ്റൻ തോമസ് ഫിലിപ്പോസിന്റെ ഭാര്യ ചിന്നമ്മ ഫിലിപ്പോസ് മുഖ്യാതിഥിയായി.
