ഇന്ത്യാന : അമേരിക്കയില് ഉന്നത പഠനത്തിനായി പോയ ഇന്ത്യന് വിദ്യാർത്ഥിയെ മരിച്ച നിലയില് കണ്ടെത്തി. യുഎസിലെ പർഡ്യൂ യൂണിവേഴ്സിറ്റിയിൽ പഠിക്കുന്ന നീൽ ആചാര്യയെ ഞായറാഴ്ചയാണ് മരിച്ച നിലയിൽ കണ്ടെത്തിയത്. മകനെ കാണാനില്ലെന്ന് അമ്മ പരാതി നല്കി മണിക്കൂറുകൾക്കുള്ളിലാണ് വിദ്യാർത്ഥിയുടെ മൃതദേഹം കണ്ടെത്തിയത്. യൂണിവേഴ്സിറ്റി ക്യാമ്പസിലാണ് നീല് ആചാര്യയെ മരിച്ച നിലയില് കണ്ടെത്തുകയായിരിന്നു. കമ്പ്യൂട്ടര് സയന്സ്, ഡാറ്റ സയന്സ് വിദ്യാർത്ഥിയായിരുന്നു നീല്. പർഡ്യൂ യൂണിവേഴ്സിറ്റിയിലെ ജോൺ മാർട്ടിൻസൺ ഓണേഴ്സ് കോളേജിലെ വിദ്യാർത്ഥിയായിരുന്നു നീല്.
നീലിന്റെ അമ്മ ഗൗരി ആചാര്യ മകനെ കാണാനില്ലെന്ന് ഞായറാഴ്ച സമൂഹ മാധ്യമമായ എക്സില് പോസ്റ്റ് ചെയ്തിരുന്നു- “ഞങ്ങളുടെ മകൻ നീൽ ആചാര്യയെ ജനുവരി 28 മുതൽ കാണാനില്ല. അവൻ യുഎസിലെ പർഡ്യൂ യൂണിവേഴ്സിറ്റിയിലാണ് പഠിക്കുന്നത്. അവനെ അവസാനമായി കണ്ടത് പർഡ്യൂ യൂണിവേഴ്സിറ്റിയിൽ എത്തിച്ച ഊബര് ഡ്രൈവറാണ്. അവനെക്കുറിച്ച് എന്തെങ്കിലും വിവരം കിട്ടുമോ എന്ന് അന്വേഷിക്കുകയാണ്. നിങ്ങൾക്ക് എന്തെങ്കിലും വിവരം കിട്ടിയാല് ദയവുചെയ്ത് ഞങ്ങളെ സഹായിക്കൂ.”
ചിക്കാഗോയിലെ ഇന്ത്യൻ കോൺസുലേറ്റ് ജനറൽ ഗൗരി ആചാര്യയുടെ പോസ്റ്റിന് മറുപടി നല്കിയിരുന്നു, കോൺസുലേറ്റ് പർഡ്യൂ യൂണിവേഴ്സിറ്റി അധികൃതരുമായി ബന്ധപ്പെട്ടിട്ടുണ്ട്, സാധ്യമായ എല്ലാ പിന്തുണയും സഹായവും നൽകും എന്നാണ് അറിയിച്ചത്. പിന്നാലെയാണ് ക്യാമ്പസില് നിന്ന് നീലിന്റെ മൃതദേഹം ലഭിച്ചത്. നീല് എങ്ങനെയാണ് മരിച്ചതെന്ന് ഇപ്പോള് വ്യക്തമല്ല.
“ഞങ്ങളുടെ വിദ്യാർത്ഥികളിലൊരാളായ നീൽ ആചാര്യ അന്തരിച്ചുവെന്ന് ഞാൻ നിങ്ങളെ വളരെ സങ്കടത്തോടെ അറിയിക്കുന്നു. കുടുംബത്തെയും സുഹൃത്തുക്കളെയും അനുശോചനം അറിയിക്കുന്നു ”- കമ്പ്യൂട്ടര് സയന്സ് മേധാവി ക്രിസ് ക്ലിഫ്റ്റൺ ഇമെയിലിൽ വിദ്യാര്ത്ഥികളെ അറിയിക്കുകയും ചെയ്തു.
