പഴയങ്ങാടി : മൃഗസംരക്ഷണവകുപ്പിനു കീഴിൽ പുതിയങ്ങാടിയിൽ പ്രവർത്തിക്കുന്ന ഊർജിത കന്നുകാലി വികസന കേന്ദ്രത്തിൽ പരാധീനതകൾ ഏറെയാണ്. മാടായി പഞ്ചായത്തിലെ വെങ്ങര മൃഗാസ്പത്രിക്കു കീഴിലും പഞ്ചായത്തിന്റെ കീഴിലുമായിട്ടാണ് ഇതിന്റെ പ്രവർത്തനം. സ്ഥലപരിമിതിമൂലം വീർപ്പുമുട്ടുകയാണ്. വൈദ്യുതിപോലുമില്ലാത്ത കെട്ടിടമാകട്ടെ പഴക്കമുള്ളതും.
കന്നുകാലികളിൽ കൃത്രിമ ബീജദാനവും മറ്റും നടത്താനായിട്ടാണ് ഇത് സ്ഥാപിച്ചത്. കുറേക്കാലം ഇവിടെ സ്ഥിരംജീവനക്കാർ ഉണ്ടായിരുന്നില്ല. ഇപ്പോൾ സ്ഥിരമായി ഒരു ലൈവ് സ്റ്റോക്ക് അസിസ്റ്റൻറിനെ ഒരുമാസം മുൻപ്‌ നിയമിച്ചു. എന്നാൽ ജീവനക്കാർക്കുവേണ്ട അടിസ്ഥാന സൗകര്യങ്ങളൊന്നുംതന്നെ ഈ പഴയ കെട്ടിടത്തിലില്ല. പ്രദേശത്തെ കർഷകർ ആവശ്യം ശക്തമാക്കുകയും പഞ്ചായത്ത് കൂടുതൽ താത്പര്യമെടുക്കുകയും ചെയ്താൽ പുതിയ കെട്ടിടം പണിയാൻ സാധിക്കും.
